01.11.2024 | 18:38
Իսպանիայում ջրհեղեղի զոհերի թիվը հասել է 208-ի. կան անհայտ թվով կորածներ
ԱՄՆ-ն Ուկրաինային 1,7 միլիարդ դոլարի ռազմական օգնություն կտրամադրի
Քաղաքականություն
30.07.2024 | 13:07
ԱՄՆ Պաշտպանության նախարարությունը հայտարարել է Ուկրաինային օգնության երկու փաթեթ տրամադրելու մասին, փոխանցում է DW-ի ռուսական ծառայությունը։
200 միլիոն դոլար արժողությամբ առաջին փաթեթը ներառում է հակաօդային պաշտպանության համակարգեր, HIMARS-ի համար զինամթերք, ականանետեր և Javelin հակատանկային հրթիռներ։ Այս փաթեթի շրջանակում զենքերն Ուկրաինա կուղարկվեն անմիջապես ամերիկյան բանակի պահեստներից։
Երկրորդ՝ 1,5 միլիարդ դոլար արժողությամբ օգնության փաթեթը կտրամադրվի Ուկրաինայի անվտանգության աջակցության նախաձեռնության (USAI) միջոցով։ Այս ծրագիրը ենթադրում է ոչ թե տեխնիկայի ուղղակի փոխանցում Ուկրաինային, այլև ձեռնարկությունների հետ պայմանագրերի կնքում զենքի արտադրության կամ գնման համար։ Կիևը, ի թիվս այլ բաների, կստանա հակաօդային պաշտպանության ուժեղացման միջոցներ, HIMARS և NASAMS համակարգերի համար զինամթերք, ռադիոէլեկտրոնային պատերազմի սարքավորումներ և բարձր ճշգրտության ավիացիոն զինամթերք։
Սա արդեն USAI-ի շրջանակում օգնության քսաներորդ փաթեթն է և ԱՄՆ ռազմական տեխնիկայի 62-րդ տրանշը, որը տրամադրվել է Ուկրաինային Ջո Բայդենի վարչակազմի կողմից 2021 թվականի օգոստոսից ի վեր։
Պենտագոնի հայտարարության մեջ նշվում է, որ ԱՄՆ-ն 50 դաշնակիցների հետ միասին շարունակելու է Ուկրաինային տրամադրել անհրաժեշտ օգնություն ռուսական ագրեսիայի դեմ պայքարելու համար։
