12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Փոքր Վեդիի մանկապարտեզի դաստիարակին մեղադրանք է առաջադրվել, հարցաքննվել են տնօրենն ու ծնողը․ ՔԿ
Հասարակություն
29.07.2024 | 14:29
Փոքր Վեդիի «Զարթոնք» մանկապարտեզում երեխային ծեծի ենթարկած դաստիարակին մեղադրանք է առաջադրվել ՀՀ քրեական օրենսգրքի 196-րդ հոդվածի 2-րդ մասի 3-րդ կետով, այն է՝ անչափահասին ուժեղ ցավ կամ ֆիզիկական ուժեղ տառապանք պատճառելը, այս մասին Factor.am-ին տեղեկացրեց Քննչական կոմիտեի մամուլի խոսնակ Գոռ Աբրահամյանը։ Նա նաև հաև հավելեց, որ անձը դեռևս արգելանքի տակ է։
ՔԿ խոսնակի փոխանցմամբ՝ երեխայի մայրը ճանաչվել է տուժողի օրինական ներկայացուցիչ, նա և տնօրենը հարցաքննվել են։
«Մանկապարտեզում այլ նմանատիպ դեպքի վերաբերյալ այս պահի դրությամբ քննությամբ դեռևս տվյալներ չեն ստացվել, սակայն այդ ուղությամբ քննություն իրականացվում է, նոր հանգամանքներ ի հայտ գալու դեպքում քրեադատավարական կարգով համապատասխան ընթացք կապահովվի»,- ասաց Գոռ Աբրահամյանը։
Նշենք, որ համացանցում տեսանյութ էր տարածվել, որում երևում է, թե ինչպես է Փոքր Վեդի համայնքի մանկապարտեզի դաստիարակը քնելու ժամին ծեծում երեխային։
Հիշեցնենք, որ Արարատի մարզպետարանից Factor.am-ին հայտնել էին, որ մանկապարտեզում երեխային ծեծի ենթարկած դաստիարակն ազատվել է աշխատանքից, իսկ մանկապարտեզի տնօրենին նկատողություն են հայտարարել։ Ոստիկանությունից էլ հաղորդել էին, որ մանկապարտեզի աշխատակիցը ձերբակալվել է։
Մանյա Պողոսյան
