Վրացի ընդդիմադիրները ՍԴ հայց են ներկայացրել «օտարերկրյա գործակալների» մասին օրենքի դեմ

Վրացի ընդդիմադիրները, հետևելով երկրի նախագահ Սալոմե Զուրաբիշվիլիին և հարյուրից ավելի հասարակական կազմակերպությունների, հայց են ներկայացրել երկրի Սահմանադրական դատարան (ՍԴ) «օտարերկրյա գործակալների» մասին օրենքի դեմ, ասել է պատգամավոր Թինա Բոկուչավան։

«Այս օրենքը պետք է չեղարկվի, այլապես կարող է անուղղելի վնաս հասցնել այս երկրին, սեպտեմբերի 3-ից կսկսվի օրենքի ամբողջական կիրարկումը և պատժամիջոցների կիրառումը, ուստի կարծում ենք, որ մինչ այդ պետք է խորհրդակցություն լինի՝ քննարկելու կասեցման հարցը»,- Սահմանադրական դատարանում լրագրողներին ասել է Բոկուչավան, որն ընդդիմադիր «Միացյալ ազգային շարժում» կուսակցության նախագահն է։

Ավելի վաղ նախագահ Զուրաբիշվիլին և ավելի քան 120 հասարակական կազմակերպություններ հայց էին ներկայացրել Սահմանադրական դատարան՝ պահանջելով կասեցնել օրենքի գործողությունը, իսկ հետագայում վերացնել այն։ Վրաստանի վարչապետ Իրակլի Կոբախիձեն ասել է, որ այդ պնդումները հեռանկար չունեն։

Newsgeorgia-ի հաղորդմամբ՝ հայցը ներկայացրել են ընդդիմադիր 38 պատգամավորներ։

Մայիսի 14-ին Վրաստանի խորհրդարանը երրորդ և վերջին ընթերցմամբ ընդունեց «Օտարերկրյա ազդեցության թափանցիկության մասին» օրենքը՝ չնայած բազմահազարանոց բողոքի ցույցերին և Արևմուտքի նախազգուշացումներին։ Մայիսի 18-ին Վրաստանի նախագահ Սալոմե Զուրաբիշվիլին վետո դրեց օրենքի վրա՝ այն անվանելով «ռուսական» և «հակասահմանադրական»։

Վրաստանի խորհրդարանի նախագահ Շալվա Պապուաշվիլին, սակայն, հունիսի 3-ին ստորագրեց օրենքը՝ շրջանցելով նախագահի վետոն։