30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ուկրաինան ATACMS հրթիռներով հարվածել է Ղրիմում ՌԴ ռազմական օդանավակայնին
Քաղաքականություն
26.07.2024 | 12:20
Հուլիսի 26-ի գիշերը ՈՒկրաինայի ԶՈՒ-ն հրթիռային հարված է հասցրել օկուպացված Ղրիմում գտնվող Սակի օդանավակայանին, հայտնում են ASTRA և «Կռիմսկիյ վետեր» Telegram ալիքները։ ASTRA-ի տվյալներով ռազմական օբյեկտի ուղղությամբ արձակվել է 4 ATACMS հրթիռ, որոնցից երկուսը խոցվել է հակաօդային պաշտպանության միջոցներով։ Հրթիռներից մեկը հարվածել է զինամթերքի պահեստին, ինչի հետևանքով պայթյուն է տեղի ունեցել և հրդեհ է բռնկվել։ Երկու զինծառայող բեկորային վնասվածքներ է ստացել։ Երկրորդ հրթիռը, ըստ Astra-ի, խոցել է ռուսական հակաօդային պաշտպանության դիրքը Սակի շրջանի Շելկովիչնայա գյուղից 5 կմ հեռավորության վրա։ Ոչնչացվել է ռադիոլոկացիոն կայանը։
ՌԴ պաշտպանության նախարարությունը չի մեկնաբանել ռազմաբազայի վրա հարձակումը։ Սակայն գիշերը Սեւաստոպոլում հայտարարվել է բալիստիկ հրթիռների հարվածի սպառնալիքի մասին, իսկ Ղրիմի կամրջով ավտոմեքենաների երթեւեկությունը արգելափակվել է։ Սպառնալիքի ազդանշանը տևել է վեց րոպե՝ Մոսկվայի ժամանակով 2:42-ից մինչև 2:48:
Վերջին անգամ Ուկրաինայի զինված ուժերը ATACMS հրթիռներով հարվածել են Ղրիմում տեղակայված ռուսական ռազմական օդանավակայանին մայիսի կեսերին։ Այն ժամանակ մեկ օրում երկու անգամ հարձակման է ենթարկվել Սևաստոպոլի մոտ գտնվող Բելբեկի օդանավակայանը, որտեղ տեղակայված է 4-րդ գվարդիական ՀՕՊ բանակի 38-րդ կործանիչ ավիացիոն գունդը։ Այն ժամանակ ՌԴ ՊՆ-ն հայտնեց բոլոր ATACMS հրթիռների ոչնչացման մասին։
Իր հերթին, Ղրիմի պարտիզանական «Աթեշ» շարժումը պնդում էր, որ Ուկրաինայի զինված ուժերը հարվածել են Բելբեկի գլխավոր հրետանային պահեստին, որտեղ պահվում էին Սու-27, Սու-30 և ՄիԳ-31 ինքնաթիռների հրթիռներ։ Բացի այդ, «երկրորդային պայթյունի հետևանքով» օդանավակայանի ենթակառուցվածքը «զգալի վնաս է կրել», հաղորդում էր պարտիզանական շարժումը։
