Բայդենը Նեթանյահուին կոչ է արել Գազայում շուտափույթ հասնել հրադադարի

ԱՄՆ նախագահ Ջո Բայդենը Իսրայելի վարչապետ Բենիամին Նեթանյահուին կոչ է որքան հնարավոր է շուտ համաձայնության գալ հրադադարի և Գազայի հատվածում պատանդների ազատ արձակման շուրջ, գրում է DW-ի ռուսական ծառայությունը։

Սպիտակ տանը տեղի ունեցած հանդիպմանը Բայդենн ընդգծել է «եղած խնդիրները լուծելու և որքան հնարավոր է շուտ համաձայնություն կնքելու, պատանդներին տուն վերադարձնելու  և Գազայում պատերազմի տևական ավարտին հասնելու անհրաժեշտությունը»։ Այս մասին ասվում է Սպիտակ տան հաղորդագրության մեջ։

Բացի այդ՝ Բայդենը ևս մեկ անգամ կոչ է արել ավելացնել մարդասիրական օգնության ծավալը Գազայում և բարելավել խաղաղ բնակչության պաշտպանությունը: Նա նշել է, որ անհրաժեշտ է «վերացնել օգնության տրամադրման բոլոր խոչընդոտները և վերականգնել հիմնական ծառայությունները նրանց համար, ովքեր դրա կարիքն ունեն։ ԱՄՆ նախագահը ևս մեկ անգամ հիշեցրել է «ռազմական գործողությունների ընթացքում քաղաքացիական անձանց կյանքը պաշտպանելու կրիտիկական նշանակությունը»։ Բայդենը վերահաստատել է Միացյալ Նահանգների «երկաթյա հանձնառությունը Իսրայելի անվտանգությանը Իրանի և նրա դրածոների բոլոր սպառնալիքների դեմ»։

Դեմոկրատական կուսակցության ​ նախագահի պոտենցիալ թեկնածու և ԱՄՆ փոխնախագահ Քամալա Հարիսը նույնպես դատապարտել է ՀԱՄԱՍ-ին, որպես դաժան ահաբեկչական կազմակերպության և ՀԱՄԱՍ-ի հետ կապված անձանց՝ նշելով, որ «գրոհայիններին աջակցելու ցանկացած հռետորաբանություն նողկալի է և անընդունելի»: Նա նաև ընդգծել է ամբողջ աշխարհում հակասեմականության աճի դեմ պայքարի կարևորությունը։

Հարիսն ընդգծել է Իսրայելի պաշտպանության իրավունքը՝ միաժամանակ արտահայտելով «լուրջ մտահոգություն Գազայի հատվածում մարդկային տառապանքների մասշտաբների վերաբերյալ»։ Դա վերաբերում է «չափազանց շատ անմեղ քաղաքացիների» մահվանը և աղետալի հումանիտար իրավիճակին։

«Մենք չենք կարող հայացքը շեղել այս ողբերգություններից։ Մենք չենք կարող մեզ թույլ տալ թմրել տառապանքի առաջ, և ես չեմ լռելու»,-հայտարարել է Քամալա Հարիսը։