28.05.2026 | 23:35
Որտե՞ղ է կռվել Արթուր Օսիպյանը․ Նիկոլ Փաշինյանին արձագանքում են Օսիպյանի մարտական ընկերները
Եվրահանձնաժողովը մերժել է Հունգարիայի և Սլովակիայի խնդրանքը՝ վերականգնելու Ռուսաստանից նավթի մատակարարումը Ուկրաինայի տարածքով․ FT
Քաղաքականություն
25.07.2024 | 23:24
Եվրահանձնաժողովը մերժել է Հունգարիայի և Սլովակիայի խնդրանքը՝ վերականգնելու Ռուսաստանից նավթի մատակարարումը Ուկրաինայի տարածքով, գրում է Financial Times-ը։ Անցած շաբաթ Ուկրաինան դադարեցրել է LUKOIL-ի նավթի փոխադրումը Հունգարիա և Սլովակիա, քանի որ ռուսական ընկերությունը ներառվել էր ուկրաինական պատժամիջոցների ցուցակում։
Նշվում է, որ հուլիսի 24-ին ԵՄ երկրների առևտրային ներկայացուցիչների հանդիպման ժամանակ Բուդապեշտը և Բրատիսլավան ԵՄ երկրներից պահանջել են պատասխան միջոցներ ձեռնարկել Ուկրաինայի դեմ՝ ԵՄ-ի հետ Ասոցացման համաձայնագրի շրջանակներում։ Պարբերականը գրում է, որ կողմերը համաձայնության չեն եկել։ Առևտրի հարցերով ԵՄ հանձնակատար Վալդիս Դոմբրովսկիսն ասել է, որ Բրյուսելին ավելի շատ ժամանակ կպահանջվի ապացույցներ հավաքելու և իրավական իրավիճակը գնահատելու համար։
Ըստ երեք դիվանագետների, որոնց հետ զրուցել է FT-ն, 11 պետություն աջակցել է ԵՀ-ի դիրքորոշումն այս հարցում, և ոչ մի երկիր չի անցել Բուդապեշտի և Բրատիսլավայի կողմը: FT-ն պարզաբանում է, որ Սլովակիայի միակ նավթավերամշակման գործարանում ռուսական նավթի մասնաբաժինը կազմում է 35-40%: Այդ նավթից արտադրանքն արտահանվում է Չեխիա և Ուկրաինա, նշում է պարբերականը։
Հունգարիայի ԱԳՆ-ն ավելի վաղ հայտնել էր, որ մատակարարման դադարեցումը խախտում է ԵՄ-ի և Ուկրաինայի միջև համաձայնագիրը։ Հունգարիան և Սլովակիան խոստացել են այս հարցով դիմել դատարան ամսվա վերջին։ Նավթի մատակարարումները կատարվում էին «Դրուժբա» խողովակաշարի հարավային ճյուղով։ Դրա համար հատուկ բացառություն է արվել ԵՄ պատժամիջոցներում։ Naftogaz-ը պնդում է, որ Եվրոպա նավթի մատակարարումների ծավալը չի փոխվել։
