Քաղաքականություն
25.07.2024 | 22:37
«Նավթը սպանում է» կարգախոսի ներքո կազմակերպված բողոքի ցույցերը հանգեցրել են Ֆրանկֆուրտի և Օսլոյի օդանավակայաններում թռիչքների դադարեցմանը։ Ցուցարարները կոչ են արել դադարեցնել հանածո վառելիքի օգտագործումը մինչև 2030 թվականը, գրում է Euronews-ը։
Գերմանիայի ամենաբեռնված օդնավակայանում չեղարկվել է ավելի քան 100 չվերթ։
«Վերջին սերունդ» շարժման ցուցարարները ճեղքել են պարիսպը և մոտեցել Ֆրանկֆուրտի օդանավակայանի թռիչքուղիներին ոտքով, հեծանիվներով և սքեյթբորդներով: Ցուցարարները պահանջել են Գերմանիայի կառավարությունից բանակցություններ վարել և ստորագրել միջազգային համաձայնագիր՝ մինչև 2030 թվականը նավթի, գազի և ածխի օգտագործումը աստիճանաբար դադարեցնելու վերաբերյալ։
«Մենք խստորեն դատապարտում ենք այս չարտոնված ցույցերը և իրավունք ենք վերապահում իրավական միջոցներ ձեռնարկել ակտիվիստների դեմ»,-հայտնել են Ֆրանկֆուրտի օդանավակայանից՝ նշելով, որ «ցուցարարների գործունեությունը լուրջ վտանգ է ներկայացնում թռիչքների համար՝ վտանգի ենթարկելով մարդկային կյանքեր»:
Օսլոյում էլ Folk Mot Fossilmakta-ի և Scientist Rebellion Նորվեգիայի շարժումների ցուցարարները արգելափակել են թռիչքների գրանցման գիծը:
Բնապահպանական խմբերն ասում են , որ ծրագրում են այս ամառ բողոքի ցույցեր կազմակերպել ամբողջ Եվրոպայի օդանավակայաններում՝ մարդկանց հիշեցնելու կապը հանածո վառելիքի, օրինակ՝ ինքնաթիռներում օգտագործվողների, և կլիմայի փոփոխության միջև: Խմբավորումները կոչ են անում ամբողջ աշխարհի կառավարություններին դադարեցնել հանածո վառելիքի արդյունահանումը և այրումը մինչև 2030 թվականը:
Նախօրեին էլ օրը բողոքի ցույցեր են տեղի ունեցել Քյոլնի, Բարսելոնայի, Հելսինկիի և Օսլոյի օդանավակայաններում։ Լոնդոնի ոստիկանությունն էլ հայտարարել է, որ խափանել է Հիթրոու օդանավակայանում նախատեսված բողոքի ցույցը, որը կարող էր էական ազդեցություն ունենալ Եվրոպայի ամենամեծ օդանավակայանի վրա:
«Այդ գործողությունները հիմար են, հանցավոր և վտանգավոր»,- ասել է Գերմանիայի ՆԳ նախարար Նենսի Ֆազերը։ Ըստ նրա՝ ակցիայի մասնակիցները ոչ միայն վտանգում են իրենց, այլև ուրիշների կյանքը։
Նշվում է, որ Եվրոպայում տասնյակ ակտիվիստներ են ձերբակալվել։
