05.04.2026 | 21:04
Թրամփը կրկին սպառնում է հարվածներ հասցնել Իրանի էլեկտրակայաններին և կամուրջներին
Օբաման ծրագրում է սատարել Քամալա Հարիսի թեկնածությանը. NBC News
Քաղաքականություն
25.07.2024 | 22:55
ԱՄՆ նախկին նախագահ Բարաք Օբաման և փոխնախագահ Քամալա Հարիսը մի քանի անգամ զրույց են ունեցել այն պահից, երբ վերջինս հայտարարել է իր թեկնածությունն առաջադրելու մասին, այս մասին հայտնում է NBC News-ը՝ վկայակոչելով քննարկումներին ծանոթ չորս աղբյուրի: Նրանք ասել են, որ Օբաման ամբողջությամբ պաշտպանել է Հարիսի թեկնածությունը և ծրագրում է շուտով աջակցել նրան:
«Նա կանոնավոր կապի մեջ է եղել Հարիսի հետ և կարծում է, որ նա հիանալի է սկսել», – ասել է նրանցից մեկը: Օբաման երկրում այն սակավաթիվ բարձրաստիճան դեմոկրատներից է, որը դեռ չի աջակցել Հարիսին: Մինչ կուսակցության այլ առաջնորդներ հրապարակային աջակցել են նրան, Օբաման առայժմ գաղտնի է պահում իր աջակցությունը:
Քննարկումներին ծանոթ աղբյուրներից մեկն ասել է, որ Օբաման չի ցանկացել, որ իր հայտարարությունը ստվերի նախագահ Ջո Բայդենի չորեքշաբթի երեկոյան հրապարակված ուղերձը։ Իրավիճակին ծանոթ երկու անձինք էլ ասել են, որ Միշել Օբաման նույնպես պաշտպանում է Հարիսի թեկնածությունը։ Աղբյուրները նաև նշել են, որ վերջին օրերին Օբաման Հարիսին առաջարկել է իր խորհուրդը քարոզարշավի կազմակերպման և Սպիտակ տան համար հաջող պայքարի այլ ասպեկտների շուրջ։
Հիշեցնենք, որ հուլիսի 21-ին ԱՄՆ նախագահ Ջո Բայդենը հայտարարել էր նախագահական մրցապայքարից դուրս գալու որոշման մասին և Դեմոկրատական կուսակցությանը առաջարկել երկրի փոխնախագահ Քամալա Հարիսի թեկնածությունն առաջադրել։ Հարիսը համաձայնել էր պայքարել առաջադրման համար։
