Քրուքսը Թրամփի դեմ մահափորձից առաջ Քեննեդիի սպանության մանրամասներն է փնտրել

20-ամյա Թոմաս Մեթյու Քրուքսը, որը կրակել էր Դոնալդ Թրամփի վրա Փենսիլվանիայում նախընտրական հանրահավաքի ժամանակ, մահափորձից մի քանի օր առաջ համացանցում փնտրել է ԱՄՆ նախագահ Ջոն Քենեդիի սպանության մանրամասները, Կոնգրեսում լսումների ժամանակ ասել է ՀԴԲ տնօրեն Քրիստոֆեր Ռեյը, գրում է BBC-ի ռուսական ծառայությունը։

Նրա խոսքով, գործակալների կողմից Քրուքսի նոութբուքի վերլուծությունը ցույց է տվել, որ նրան, մասնավորապես, հետաքրքրել է, թե 1963 թվականի նոյեմբերին Դալլասում Քենեդիին գնդակահարած Լի Հարվի Օսվալդը ինչ հեռավորության վրա է եղել նախագահից։
«Հուլիսի 6-ին նա Google-ում որոնել է․ «Որքա՞ն հեռու էր Օսվալդը Քենեդիից», – ասել է Ռեյը Ներկայացուցիչների պալատի դատական հանձնաժողովի անդամներին:
«Այդ նույն օրը նա, ըստ երևույթին, գրանցվել է Բաթլերում անցկացված հանրահավաքին մասնակցելու համար», – ասել է ՀԴԲ տնօրենը:
Ռեյը նաև ասել է, որ Քրուքսը անօդաչու թռչող սարք է օգտագործել հանրահավաքի տարածքը հետազոտելու համար Թրամփի բեմ դուրս գալուց մոտ երկու ժամ առաջ: Անօդաչու թռչող սարքը օդում է եղել 11 րոպե։ Սարքը և դրա հեռակառավարման վահանակը հայտնաբերվել են կրակողի մեքենայում՝ երկու պայթուցիկ սարքերի հետ միասին։ Քրուքսի տանը ևս մեկ ռումբ է հայտնաբերվել:

Դոնալդ Թրամփի դեմ մահափորձը տեղի է ունեցել հուլիսի 13-ին Փենսիլվանիայի Բաթլեր քաղաքում նախընտրական հանրահավաքի ժամանակ։ Թոմաս Մեթյու Քրուքսը կրակ է բացել AR-15 տեսակի հրացանից՝ Թրամփի ելույթը սկսելուց րոպեներ անց։
Գնդակներից մեկը դիպել է նրա աջ ականջին, երկու ցուցարարներ ծանր վիրավորվել են, իսկ Փենսիլվանիայից 50-ամյա հրշեջը զոհվել է։ Հրաձիգը թաքնված է եղել բեմից մոտ 100 մետր հեռավորության վրա գտնվող ձեռնարկության տանիքում։ Նա վնասազերծվել է։