09.04.2026 | 21:23
Ցուցակի առաջինը ես եմ, 2-րդը` Թևանյանը, 3-րդը` Լուիզա Սարգսյանը. Ծառուկյան. ՏԵՍԱՆՅՈՒԹ
Թուրքիայում ապրիլ-հունիս ամիսներին 200 լրագրող է դատարանի առջև կանգնել․ զեկույց
Քաղաքականություն
24.07.2024 | 22:48
Թուրքիայում ապրիլ-հունիս ամիսներին դատարանի առաջ է կանգնել 200 լրագրող։ Այս մասին է վկայում Bianet-ի հրապարակած BİA Media Monitoring-ի զեկույցը,, փոխանցում է Stockholm center of freedom-ը։
Զեկույցում արձանագրվել են երկրում լրագրողների և լրատվամիջոցների դեմ զգալի թվով դատական հայցեր, սպառնալիքներ և հարձակումներ: Այդ եռամսյա ժամանակահատվածում թուրքական դատարանները և իշխանությունները սահմանափակումներ են մտցրել առնվազն 2970 լրատվական հաղորդումների և սոցիալական ցանցերում հարակից հրապարակումների հասանելիության վրա՝ որպես այդ որոշումների հիմքում նշելով «անձնական իրավունքները»։
Ռադիոյի և հեռուստատեսության բարձրագույն խորհուրդը (RTÜK) նաև ավելի քան 29 միլիոն թուրքական լիրա (890,000 դոլար) տուգանքներ է սահմանել տարբեր հեռուստաալիքների նկատմամբ՝ իրենց նորությունների և հաղորդումների համար։
Բացի այդ՝ վեց լրագրողներ ընդհանուր առմամբ դատապարտվել են 18 տարի երեք ամիս ազատազրկման՝ «ահաբեկչական կազմակերպությանն օժանդակելու» մեղադրանքով՝ Քուրդիստանի աշխատավորական կուսակցության (PKK) ենթադրյալ կապերի պատճառով։
17 լրագրողների և ծաղրանկարիչների մեղադրանք է առաջադրվել «նախագահին վիրավորելու» համար։ Թուրքիայում մայիսմեկյան ցույցերից և տեղական ինքնակառավարման մարմինների ընտրություններից հետո առնվազն 12 լրագրող է ձերբակալվել։ Եվս 24 լրագրող կանգնել է դատարանի առաջ մի քանի քրեական գործերով՝ «վիրավորանքի», «պետական պաշտոնյային վիրավորելու» կամ «զրպարտության» համար։
Վեց լրագրողի դատի են տվել ավելի քան 2 միլիոն թուրքական լիրա (60,000 դոլար) վնասի փոխհատուցման պահանջով։
Վերջին երեք ամիսների ընթացքում հարձակման է ենթարկվել առնվազն 11 լրագրող և մեկ թերթի՝ İslahiye’nin Sesi Gazetesi-ի գրասենյակը։ Վեց լրագրող, այդ թվում՝ չորս հետաքննող լրագրողներ սպառնալիքներ են ստացել։ Այդ հարձակումներից ինը տեղի են ունեցել ընտրությունների համատեքստում։
Էմմա Չոբանյան
