Թուրքայի խորհրդարանի հանձնաժողովը ընդունել է օրինագիծ, որը զանգվածային սպանությունների մտավախություն է առաջացնում

Թուրքիայի խորհրդարանի հանձնաժողովը հավանություն է տվել 17 հոդվածից բաղկացած օրինագծին, որն ուղղված է երկրում թափառող շների պոպուլյացիայի կառավարմանը։ Երկրի նախագահ  Ռեջեփ Թայիփ Էրդողանի «Արդարություն և զարգացում» կուսակցությունն է այն ներկայացրել՝ հիմնավորումով, որ մոտ 4 միլիոն թափառող կենդանի կա Թուրքիայի փողոցներում և գյուղական վայրերում։ Նախագիծն արժանացել է կենդանիների իրավունքների պաշտպանների և ընդդիմադիր կուսակցությունների բուռն քննադատությանը, որոնք պնդում են, որ դա ճանապարհ է հարթում կենդանիների զանգվածային սպանդի համար, գրում են թուրքական լրատվամիջոցները։

Խորհրդարանի Գյուղատնտեսության, անտառային և գյուղական հարցերի հանձնաժողովում ավելի քան 42 ժամ տևած քննարկումից հետո, օրինագիծը մի քանի փոփոխության է ենթարկվել որպես թափառող շների դեմ պայքարի միջոց էվթանազիա կիրառելու կետի շուրջ մեծ դժգոհությունից հետո։

Օրինագծի ամենավիճահարույց հատվածում նշվում էր, որ  ՏԻՄ-երը կարող են էֆթանազիայի ենթարկել բոլոր շներին, որոնք «հանրային անվտանգությանը վտանգ են ներկայացնում»:Օրինագծի հաստատված տարբերակը թույլատրում է միայն անբուժելի հիվանդությամբ շների էվթանազիան։ Այնուամենայնիվ, դեռևս մտավախություն կա, որ վերանայված օրինագիծը դեռևս կարող է հնարավորություն ընձեռել քաղաքապետարաններին սպանել շներին այն պատրվակով, որ նրանք մահացու հիվանդ են, փոխանակ իրենց ֆինանսական միջոցները հատկացնեն ապաստարաններում նրանց խնամելու համար:

Օրինագիծը քննադատության է ենթարկվում նաև ընդդիմադիր կուսակցությունների կողմից այն բանի համար, որ չի նշում պետական ​​միջոցների որևէ հատկացում քաղաքապետարաններին՝ օգնելու այն ծախսերին, որոնք կառաջանան թափառող շների պոպուլյացիայի վերահսկմանն ուղղված նրանց ջանքերին:

Օրինագիծը հաստատվել է ԱԶԿ-ի և նրա ծայրահեղ աջ դաշնակցի՝ Ազգայնական շարժում կուսակցության (MHP) ձայներով։ Նրանք մեծամասնություն են կազմում խորհրդարանում, և օրինագիծը, ամենայն հավանականությամբ, կընդունվի, երբ այն հասնի ընդհանուր ժողովին վերջնական հաստատմանը:

Էմմա Չոբանյան