Մոսկվայում մտադիր են Ռուսաստանից մեկնածների տվյալների բազա ստեղծել

Ռուսաստանի ՆԳՆ-ն առաջարկել է ստեղծել Ռուսաստանից հեռացած քաղաքացիների տվյալների բազա։ Այս առաջարկը տեղ է գտել  Վլադիմիր Պուտինին ներկայացված ծայրահեղականության դեմ պայքարի նոր ռազմավարության նախագծում, գրում է DW-ի ռուսական ծառայությունը։

Մասնավորապես, առաջարկվում է վարել «ծայրահեղական կազմակերպություններին մասնակցելու, ինչպես նաև՝ ոչ բարեկամ պետությունների օտարերկրյա կենտրոններում վերապատրաստում անցնելու համար» Ռուսաստանից հեռացածների հաշվառում։ Թե կոնկրետ ովքեր են ներառվելու տվյալների բազայում, ինչպես նաև, թե ինչ տվյալներ պետք է պարունակի այն, չի նշվում։

Ինչպես հուլիսի սկզբին հաղորդել էր գործակալությունը, համացանցում հայտնվել է ուկրաինական պատերազմի սկսվելուց հետո երկիրը լքած ռուսների տվյալների բազան։ Ցուցակից դուրս եկած անձի «Ռուսաստանի Դաշնությունից 2022-2024թթ. հեռացածներ» քարտը պարունակում է նրա անունը, ազգանունը և հայրանունը, ծննդյան ամսաթիվը, ինչպես նաև երկիրը լքելու ամսաթիվը, ուղղությունը և պատճառ»: Այդպիսի «պատճառները» ընդամենը երեքն են՝ «Հատուկ ռազմական օպերացիայի սկիզբը», «զորահավաքի հայտարարումը» և «Վագների ապստամբությունը»։

Ցուցակը կազմվել է՝ օգտագործելով ավիաընկերությունների տվյալները, ինչպես նաև տեղեկությունները ծովով, ավտոմոբիլային ճանապարհով  և անգամ ոտքով երկիրը լքածների մասին։ Այդուհանդերձ՝ «Ագենստվոն» ստուգել էր 2022-2023 թվականներին Ռուսաստանից հեռացած 10 մարդկանց մասին հրապարակված տվյալները, որոնցից երկուսին չէր հայտնաբերել տվյալների բազայում։ Լրագրողները սխալներ էին հայտնաբերել ևս երկու մարդկանց տվյալներում։