30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Խորհրդանշական պատիժ Օրբանին․ ԵՄ ԱԳ նախարարները որոշել են հանդիպել ոչ թե Բուդապեշտում, այլ Բրյուսելում
Քաղաքականություն
23.07.2024 | 11:45
ԵՄ արտաքին քաղաքականության ծառայության ղեկավար Ժոզեպ Բորելը նախօրեին միության երկրների ԱԳ նախարարների հանդիպումից հետո հայտարարել է, որ որոշվել է օգոստոսին նախարարների ոչ պաշտոնական հանդիպում անցկացնել ոչ թե նախագահող երկրում՝ Հունգարիայում, այլ Բրյուսելում, գրում է BBC-ի ռուսական ծառայությունը։
Սա արձագանքն է Հունգարիայի վարչապետ Վիկտոր Օրբանի դիրքորոշմանը Ուկրաինայի վերաբերյալ։
«Ես հասկացա, որ մենք պետք է ազդանշան ուղարկենք, թեկուզ խորհրդանշանական, որ եթե հանդես ես գալիս ԵՄ հիմնական քաղաքականության դեմ և մերժում Եվրամիության քաղաքականությունը՝ այն անվանելով պատերազմի կողմ, ապա պետք է լինեն որոշակի հետևանքներ»,-ասել է Բորելը՝ հավելելով․
«Նույնիսկ եթե դրանք ֆորմալ հետևանքներ են, խորհրդանշական հետևանքներ։ Ոչ մի առանձնահատուկ բան չի լինի, սակայն ես կարծում եմ, որ տեղին կլինի դրսևորել այս վերաբերմունքը և կոչ անել, որ արտաքին գործերի և պաշտպանության նախարարների հաջորդ խորհուրդները՝ ոչ պաշտոնական, անցկացվեն Բրյուսելում»։
Ոչ պաշտոնական հանդիպումները սովորաբար անցկացվում են ԵՄ-ում ռոտացիոն կարգով նախագահող երկրում։ Հուլիսի 1-ից Հունգարիան վեց ամսով ստանձնեց նախագահությունը և հենց հաջորդ օրը Վիկտոր Օրբանը անսպասելի այցով մեկնեց Կիև, որտեղ հանդիպեց Ուկրաինայի նախագահ Վլադիմիր Զելենսկիին, այնուհետև մեկնեց Մոսկվա, Պեկին և Միացյալ Նահանգներ՝ հանդիպելով նախագահի թեկնածու Դոնալդ Թրամփի հետ։
Օրբանն այս այցերի ընթացքում հայտարարում էր, որ շոշափում է պատերազմը դադարեցնելու հնարավորությունները։ Ընդ որում՝ նա հրապարակային խոսքում այնպիսի դիրքորոշմամբ էր խոսում, որը սկզբունքորեն հակասում է ԵՄ երկրների ճնշող մեծամասնության մոտեցմանը։
Ռուսաստանի կողմից Ուկրաինայի դեմ պատերազմ սանձազերծելու պահից Օրբանը հրաժարվել է ռազմական օգնություն տրամադրել Ուկրաինային, փորձել նաև սաբոտաժի ենթարկել Մոսկվայի դեմ պատժամիջոցների սահմանումը և շարունակում է նաև արգելափակել ԵՄ մակարդակով Ուկրաինային օգնության տրամադրման վերաբերյալ որոշումները:
