Ռուսաստանը Գերմանիային սպառնացել է միջուկային զենքով՝ ամերիկյան հրթիռների տեղակայման համար

Ռուսաստանը կարող է «միջուկային սարքավորումներով» հրթիռներ տեղակայել՝ ի պատասխան Գերմանիայի տարածքում ամերիկյան հեռահար հրթիռների տեղակայման։ Այս մասին հայտարարել է ՌԴ փոխարտգործնախարար Սերգեյ Ռյաբկովը, փոխանցում է The Moscow Times-ը։

«Ես ոչ մի տարբերակ չեմ բացառում. եթե Գերմանիայի Դաշնային կառավարության ներկայացուցիչներն արդարացված համարեն որոշակի էսկալացիոն միջոցառումներ սկսելը այն պատրվակով, ինչ ունենք կոնկրետ այս տարածաշրջանում (Կալինինգրադի մարզ), ապա մենք փոխհատուցման միջոցների առումով կարձագանքենք այնպես, ինչպես մեզ համար ամենաընդունելին կլինի»,- ասել է Ռյաբկովը։

Ավելի վաղ Պենտագոնը հայտարարել էր, որ Միացյալ Նահանգները Գերմանիայում հեռահար հարվածային համակարգեր կտեղակայի 2026 թվականին։ Դրանք կներառեն SM-6 զենիթային հրթիռներ, Tomahawk թևավոր հրթիռներ և փորձարարական ոչ միջուկային գերձայնային զենքեր:

Գերմանիայի կանցլեր Օլաֆ Շոլցն այս որոշումը բացատրել է երկրի անվտանգության ապահովմամբ և «պատերազմը կանխելու» միջոցներով։ Նա բացառել է Ուկրաինայում հակամարտության սրումը և Գերմանիայում ամերիկյան զենքի պատճառով Ռուսաստանի և ՆԱՏՕ-ի առճակատումը։

Ավելի ուշ Գերմանիայի պաշտպանության նախարար Բորիս Պիստորիուսը հայտարարել է, որ գերմանական տարածքում ամերիկյան գերձայնային զենքի ու թևավոր հրթիռների գտնվելու վայրը դեռ որոշված չէ։ Նա վստահեցրել է, որ խոսքը «սովորական սպառազինության համակարգերի մասին է»։

Ըստ DW-ի՝ եթե ԱՄՆ-ը գերձայնային զենք փոխանցի Գերմանիային, ապա Սառը պատերազմից հետո առաջին անգամ երկրի տարածքում կհայտնվեն զենքի համակարգեր, որոնք կարող են խոցել թիրախները Ռուսաստանում։

Այս ֆոնին ՌԴ նախագահի մամուլի քարտուղար Դմիտրի Պեսկովը հայտարարել է, որ Ռուսաստանը բավական զսպման ներուժ ունի Եվրոպայում ԱՄՆ հեռահար հրթիռների տեղակայման դեպքում, սակայն Մոսկվան պետք է իր հրթիռներն ուղղի եվրոպական երկրների մայրաքաղաքներին։