ԲԴԽ-ն գտավ Քոչարյանի տապալված գործի «մեղավորին». Դեպարտամենտի ֆիլմը՝ դատավորի լիազորությունների դադարեցման պատճառ․ ՏԵՍԱՆՅՈՒԹ

Երևանի ընդհանուր իրավասության դատարանի դատավոր Աննա Դանիբեկյանին 5 ամիս առաջ ՀՀ երկրորդ նախագահ Ռոբերտ Քոչարյանի գործը տապալելու մեջ մեղադրող Բարձրագույն դատական խորհուրդն այսօր «գործն» ավարտին հասցրեց․ Խորհրդի 7 անդամների միաձայն որոշմամբ դատավորի լիազորությունները դադարեցվեցին։ Աննա Դանիբեկյանը չէր ներկայացել որոշման հրապարակմանը։

Դատավորին կարգապահական պատասխանատվության ենթարկելու միջնորդությունը Խորհուրդ ներկայացրել էր Գրիգոր Մինասյանի ղեկավարած Արդարադատության նախարարությունը՝ հենվելով հենց Դատական դեպարտամենտի կողմից պատրաստած աղմկահարույց ֆիլմի մեղադրանքների վրա։

Արդեն նախկին դատավոր Դանիբեկյանը, սակայն, համաձայն չէր ինչպես աղմկահարույց ֆիլմի, այնպես էլ նախարարության կողմից ներկայացված միջնորդության հիմքերի հետ։ Վարույթի քննության ընթացքում դատավորն առանձին-առանձին անդրադառնում էր դրանց և հիմնավորումներ ներկայացնում։ Նախարարությունն էլ իր հերթին փորձում էր հակադարձել Դանիբեկյանի դիրքորոշումներին։ Գրիգոր Մինասյանի խորհրդական Արտյոմ Սուջյանը շեշտում էր՝ Քոչարյանի գործով Դանիբեկյանը թույլ է տվել դատավորի վարքագծի խախտումներ։

Ուշագրավ է, որ Աննա Դանիբեկյանին այդպես էլ հնարավորություն չտրվեց իր մասով հարուցված վարույթի մասին դիրքորոշում հայտնել․ նախորդ նիստին, ընդամենը մի քանի րոպե ուշանալու պատճառով, ԲԴԽ նախագահ Կարեն Անդրեասյանը հայտարարեց, որ վարույթի քննությունն ավարտված է։ Արդեն այսօր Խորհրդի նախագահը, մինչ որոշման հրապարակումը, տեղեկացրեց, որ Դանիբեկյանից միջնորդություն են ստացել վարույթի քննությունը վերսկսելու մասին, քանի որ չի ապահովվել լսված լինելու իր իրավունքը, սակայն միջնորդությունը մերժվեց, ինչից հետո հրապարակվեց որոշումը՝ Ռոբերտ Քոչարյանի գործի տապալման համար դատավորն է մեղավոր։

Ուշագրավ է, որ Դանիբեկյանի մեղավորությունը Ռոբերտ Քոչարյանի գործով այդքան էլ միանշանակ չէ, քանի որ նախկին նախագահն արդարացվեց Սահմանադրական դատարանի որոշումից հետո, երբ նրան վերագրվող հոդվածը հակասահմանադրական ճանաչվեց: Իսկ կաշառքի գործով քրեական հետապնդումը դադարեցվեց վաղեմության ժամկետն անցնելու հիմքով, որը, ըստ իրավապաշտպան Նինա Կարապետյանցի, ամենակարևոր գործերից մեկը չէ, որն այսօր շեշտում էր Անդրեասյանը։

Աննա Դանիբեկյանը, թեև ընդամենը 8 տարվա դատավոր էր, սակայն, ըստ «Դատալեքս» դատական տեղեկատվական համակարգի, նրան է մակագրված է 279 գործ։ Փաստացի, այն գործերը, որոնցով Դանիբեկյանը չի հասցրել դատավճիռ կայացնել, կվերսկսվեն, ինչը նշանակում է, որ, օրինակ, 5 տարի քննվող նախկին փոխվարչապետ Արմեն Գևորգյանի և 7 տարի քննվող Գեղարքունիքի մարզի ընդհանուր իրավասության դատարանի նախկին նախագահ Աղվան Պետրոսյանի գործերի քննությունները կսկսվեն նորից։

Մանրամասները՝ տեսանյութում։

Ռոզա Վարդանյան