Քաղաքականություն
12.07.2024 | 21:00Մակրոնն ու Էրդողանը հանդիպել են ՆԱՏՕ-ի գագաթնաժողովի շրջանակում։ Ըստ Փարիզի՝ Մակրոնը վերահաստատել է իր աջակցությունը ՀՀ-ի և Ադրբեջանի միջև ընթացող երկխոսությանը՝ ուղղված պայմանագրին հնարավորինս շուտ հասնելուն, որը կարող է նոր էջ բացել տարածաշրջանում: Էրդողանն ասուլիսում պատասխանել է հարցին՝ «հնարավո՞ր է՝ ՀՀ-ի և Ադրբեջանի միջև պայմանագիրը ստորագրվի մինչև տարեվերջ», արձագանքելով․ «Հիմա որոշումը կայացնում է պարոն Իլհամը, ոչ թե ես։ Մեր սիրտը ցանկանում է, որ այն ստորագրվի, և խաղաղություն տիրի ՀՀ-ի և Ադրբեջանի միջև։ ՀՀ-ի վարչապետի հետ մեր հանդիպումներում տեսնում ենք, որ այստեղ ևս դրական քայլեր են արվել։ Իմ եղբոր՝ Իլհամի հետ իմ հանդիպումներում նա նույնպես հանդես է գալիս դրական քայլերի օգտին»։
Քաղաքական մեկնաբան Հակոբ Բադալյանը, Factor TV-ի հետ զրույցում մեկնաբանելով այս իրավիճակը, նշում է․ «Էրդողանը հրաժարվեց Շուշիում մասնակցել Թյուրքալեզու պետությունների կազմակերպության ժողովին և գնաց Թուրքիայի ֆուտբոլի հավաքականի խաղը դիտելու։ Այսօր նա Ալիևի հետ տարակարծիք է իրավիճակի զարգացման հարցում։ Թուրքիային դուր չի գալիս, որ Ալիևը փորձում է Էրդողանի ազդեցությունից դուրս գալ, որպես ինքնուրույն խաղացող դիրքավորվել, քանի որ Թուրքիան զրկվում է խաղաքարտերից»։
Այդուհանդերձ, Բադալյանը կարծում է, որ Թուրքիան ՀՀ-ի հետ հարաբերությունների ընթացքը շարունակելու է Ադրբեջանի հետ հարաբերություններով պայմանավորել։ Ի՞նչ նկատի ունի Էրդողանը՝ ասելով, թե ՀՀ-ի վարչապետի հետ իր հանդիպումներում տեսնում են, որ այստեղ ևս դրական քայլեր են արվել։
«Էրդողանը նկատի ունի՝ ՀՀ-ն խելոք է պահում իրեն, Թուրքիային անհարմարություն չի պատճառում, չգիտեմ՝ Փաշինյանի հետ ինչ են խոսում, ով է կազմակերպում այդ խոսակցությունները և այլն»,- ասաց Բադալյանը։
Հարցազրույցն ամբողջությամբ՝ տեսանյութում։
Ռոբերտ Անանյան
