Սխալ է ԱՄՆ-ի հաշվարկը, թե Ադրբեջանը կգնա ՌԴ-ի ազդեցության նվազեցման․ նա մանևրում է խոշոր ուժերի միջև․ Տիգրան Գրիգորյան․ ՏԵՍԱՆՅՈՒԹ

Վաշինգտոնում Միրզոյան-Բայրամով հանդիպումն ընդունելուց առաջ ԱՄՆ Պետքարտուղար Բլինքենը ասել է, թե Հայաստանն ու Ադրբեջանը շատ մոտ են հասնելու վերջնական համաձայնության։ Իսկ ՀՀ-ն և Ադրբեջանը հետո հայտարարեցին․ «Կողմերը նշել են խաղաղության և միջպետական հարաբերությունների հաստատման վերաբերյալ պատմական պայմանագրի կնքման ուղղությամբ Հայաստանի և Ադրբեջանի կողմից գրանցված առաջընթացը և համաձայնել են շարունակել աշխատանքները»։ Ո՞րն է այս հանդիպման արդյունքը։ Ժողովրդավարության և անվտանգության տարածաշրջանային կենտրոնի ղեկավար, քաղաքագետ Տիգրան Գրիգորյանը Factor TV-ի հետ զրույցում ասում է, որ այս հանդիպման արդյունքը հենց հանդիպման տեղի ունենալու փաստն է․

«Ամերիկյան միջնորդությամբ նախորդ հանդիպումը կայացել էր 2023-ի հունիսին, այսինքն՝ Ադրբեջանը մեկ տարուց ավելի հրաժարվում էր ամերիկյան միջնորդությամբ հանդիպումից։ Կարող ենք Գերմանիայի հանդիպումը հանել արանքից։ Այս հանդիպումից Ադրբեջանը չհրաժարվեց՝ զուտ քաղաքավարությունից ելնելով։ ԱԳ նախարարները ՆԱՏՕ-ի գագաթնաժողովին մասնակցելու համար հրավիրվել էին Վաշինգտոն և պարզ է՝ դժվար կլիներ մերժել հրավերը»։ Մեկնաբանելով ԱՄՆ Պետքարտուղարի հայտարարությանը, Գրիգորյանն ասում է, որ այդ հայտարարությունը լսվում է արդեն երկու տարի, թե կա պայմանագիր կնքելու պատմական հնարավորություն։

«Երկու տարի անցել է, և ունենք այն, ինչ ունենք։ Պետք է լուրջ վերապահումներով վերաբերվել նման հայտարարություններին, որովհետև տեսնում ենք՝ Ադրբեջանը նոր պահանջներ է առաջ քաշում, երբ փոքր առաջընթաց է տեղի ունենում։ Պարզ չէ՝ ամերիկյան կողմը ինչպես է պատրաստվում Բաքվի հետ աշխատել»,- նշեց քաղաքագետը։ Նա համաձայն է այն գնահատականի հետ, որ ՌԴ-ի ազդեցությունը նվազելու է, եթե ՀՀ-ն կարգավորի Ադրբեջանի և Թուրքիայի հետ հարաբերությունները, սակայն Գրիգորյանը նշում է նաև, որ սխալ է ԱՄՆ-ի հաշվարկը, թե Ադրբեջանը կգնա ՌԴ-ի ազդեցության նվազեցման, քանի որ Ալիևը մանևրում է խոշոր ուժերի միջև։

Հարցազրույցն ամբողջությամբ՝ տեսանյութում։

Ռոբերտ Անանյան