03.04.2026 | 23:13
NASA-ն հրապարակել է Երկրի նոր լուսանկարը
ՌԴ-ն պետք է խզի Ուկրաինայում կռվող Հնդկաստանի քաղաքացիների հետ պայմանագրերը․ Մոդիի պայմանը Պուտինին
Քաղաքականություն
09.07.2024 | 15:08
Ռուսաստանը որոշել է աշխատանքից հեռացնել Հնդկաստանի բոլոր քաղաքացիներին, որոնք պայմանագիր են կնքել ՌԴ Պաշտպանության նախարարության հետ՝ այն բանից հետո, երբ Հնդկաստանի վարչապետ Նարենդրա Մոդին Մոսկվա կատարած այցի ժամանակ ՌԴ նախագահ Վլադիմիր Պուտինի հետ զրույցում բարձրացրել է այս հարցը։ Այս մասին հայտնում է NDTV հեռուստաալիքը՝ սեփական աղբյուրներին հղումով, գրում է Current time-ը։
Նշվում է, որ Ռուսաստանի զինված ուժերում կռվող Հնդկաստանի քաղաքացիների հետ պայմանագրերը խզելուց բացի, ռուսական կողմը կաջակցի նրանց հայրենիք վերադառնալուն։
2024 թվականի փետրվարին Հնդկաստանի իշխանությունները հայտնել էին երկրի մոտ 20 քաղաքացու վերադարձնելու մասին, որոնք ռուսական բանակում են։ AFP-ն գրել էր, որ նրանք կարող էին Ռուսաստանում հայտնվել «բանակային օգնականների» դերում։ Ըստ լրատվամիջոցի՝ Հնդկաստանի մի քանի քաղաքացիների առաջարկել էին աշխատել ավերված շենքերում, սակայն ժամանելուց հետո նրանց «զենք են տվել»։
Մարտի 6-ին Հնդկաստանի յոթ քաղաքացիներ տեսաուղերձ էին ձայնագրել, որտեղ ասում էին, որ իրենց խաբեությամբ ուղարկել են պատերազմելու Ուկրաինայի դեմ։
Հնդկաստանի Հետաքննությունների կենտրոնական բյուրոն (CBI) հայտնել էր, որ Ռուսաստանի տարածքով արդեն Ուկրաինայում պատերազմի ուղարկված հնդիկների թվում կան նաև ծանր վիրավորներ։ Միևնույն ժամանակ, ըստ Reuters-ի՝ հավաքագրված հնդիկներից երկուսն արդեն մահացել են ուկրաինական պատերազմում, նրանց մարմինները մնացել են մարտի դաշտում։ Ապրիլին էլ Հնդկաստանի ԱԳՆ-ն հայտնել էր, որ Ուկրաինայից հայրենիք են վերադարձել նախկինում հավաքագրված տասը տղամարդ։
Միաժամանակ, մայիսին Հնդկաստանը հայտարարել էր 4 մարդու կալանավորման մասին, որոնք կասկածվում են մարդկանց թրաֆիքինգի խոշոր ցանցում մասնակցության մեջ, որոնց անդամները խաբեությամբ երիտասարդներին Ռուսաստան էին տանում, որտեղ նրանց ստիպում էին պայմանագրեր կնքել Ռուսաստանի Պաշտպանության նախարարության հետ և ուղարկում Ուկրաինա՝ պատերազմի:
