11.08.2026 | 10:33
Աննա Մկրտչյանի հայրը՝ Քասախի նախկին ղեկավարը կալանավորվել է
Բայդենը հայտնել է, որ ԱՄՆ-ն ու ՆԱՏՕ-ի դաշնակիցները կհայտարարեն Ուկրաինայի ՀՕՊ-ի ամրապնդման մասին՝ մանկական հիվանդանոցի վրա հարձակումից հետո
Քաղաքականություն
09.07.2024 | 13:29
ԱՄՆ նախագահ Ջո Բայդենը հայտարարել է, որ Վաշինգտոնը և ՆԱՏՕ-ի նրա դաշնակիցներն այս շաբաթ կհայտարարեն նոր միջոցների մասին՝ ուժեղացնելու Ուկրաինայի հակաօդային պաշտպանությունը։ Այս մասին ասվում է Սպիտակ տան՝ Կիևի մանկական հիվանդանոցի վրա ռուսական հրթիռային հարձակման առնչությամբ ամերիկացի առաջնորդի հայտարարության մեջ, գրում է Current time-ը։
Բայդենը նշել է, որ ռուսական հրթիռային հարձակումներն Ուկրաինայի, այդ թվում՝ Կիևի գլխավոր մանկական հիվանդանոցի վրա, «սարսափելի հիշեցում են Ռուսաստանի դաժանության մասին»:
«Ռուսաստանի հրթիռային հարվածները, որոնց արդյունքում այսօր զոհվել են Ուկրաինայի տասնյակ խաղաղ բնակիչներ, ինչպես նաև կան զոհեր ու ավերվածություններ Կիևի խոշորագույն մանկական հիվանդանոցում, Ռուսաստանի դաժանության սարսափելի հիշեցում են»,- ասվում է հայտարարության մեջ։
ԱՄՆ նախագահի խոսքով՝ «կարևոր է, որ աշխարհը շարունակի աջակցել Ուկրաինային այս կարևոր պահին, և որ չանտեսեն ռուսական ագրեսիան»։
«Այս շաբաթ ես Վաշինգտոնում կհյուրընկալեմ նախագահ Զելենսկիին և ՆԱՏՕ-ի առաջնորդներին, և ես կհանդիպեմ նախագահ Զելենսկիի հետ՝ հստակեցնելու, որ մեր աջակցությունն Ուկրաինային անսասան է»,- ասել է Բայդենը։
Զելենսկիի ներկայացրած վերջին տվյալների համաձայն՝ նախօրեի Ռուսաստանի զանգվածային հրթիռակոծության հետևանքով զոհվել է 37 մարդ, այդ թվում՝ 3 երեխա, 170 մարդ վիրավորվել է, որից 13-ը՝ երեխաներ։
