07.10.2026 | 23:00
Երթևեկության կազմակերպման փոփոխություն՝ Հակոբ Պարոնյան փողոցում
ՌԴ ՊՆ-ն՝ Ուկրաինայի զանգվածային հրթիռակոծության մասին
Քաղաքականություն
08.07.2024 | 18:20
Ռուսաստանի Պաշտպանության նախարարությունը պնդում է, թե հուլիսի 8-ի առավոտյան հարվածներ է հասցրել ուկրաինական ռազմական արդյունաբերության օբյեկտներին և Ուկրաինայի զինված ուժերի ավիաբազային, գրում է Meduza-ն։
Նշվում է, որ դա արվել է՝ ի պատասխան «Կիևի վարչակարգի՝ ռուսական էներգետիկ և տնտեսական օբյեկտներին վնաս պատճառելու փորձերի»։
«Հարվածի նպատակները տեղ են հասել։ Նշանակված թիրախները խոցվել են։ Կիևի վարչակարգի ներկայացուցիչների հայտարարություններն այն մասին, թե, իբր, Ռուսաստանի կողմից դիտավորյալ հրթիռային հարված է հասցվել քաղաքացիական օբյեկտներին, բացարձակապես չեն համապատասխանում իրականությանը։ Կիևից հրապարակված բազմաթիվ լուսանկարներ և տեսանյութեր հստակորեն հաստատում են քաղաքի ներսում զենիթահրթիռային համակարգից արձակված ուկրաինական հակաօդային պաշտպանության հրթիռի անկման հետևանքով փլուզումների փաստը»,- ասվում է ՌԴ ՊՆ հաղորդագրության մեջ։
Ավելի վաղ Ուկրաինայի իշխանությունները հայտարարել էին, որ հուլիսի 8-ին ռուս զինվորականները միտումնավոր հարձակվել են Կիևի քաղաքացիական ենթակառուցվածքների վրա, մասնավորապես, վնասելով մի քանի բնակելի բարձրահարկ շենքեր, ինչպես նաև «Օխմատդետ» մանկական հիվանդանոցի շենքը։
