07.10.2026 | 10:46
Գագիկ Խաչատրյանից առգրավված 70 կտավ հանձնվել է Ազգային պատկերասրահին
Թուրքիայում 8 քուրդ լրագրողներ դատապարտվել են ավելի քան 6 տարվա ազատազրկման
Քաղաքականություն
05.07.2024 | 23:30
Ութ քուրդ լրագրողներ, որոնք ձերբակալվել էին 2023 թվականի մայիսի 16-ին Անկարայում հետաքննության շրջանակում և ազատ արձակվել մինչև դատավարությունը, դատապարտվել են վեց տարի և երեք ամիս ժամկետով ազատազրկման, գրում են թուրքական լրատվամիջոցները։
Mezopotamya գործակալությանը (MA) և JINNEWS-ին առնչվող լրագրողները դատապարտվել են «ահաբեկչական կազմակերպությանն անդամակցելու» մեղադրանքով՝ Քուրդիստանի աշխատավորական կուսակցության (PKK) հետ ենթադրյալ կապերի պատճառով։ Նրանք են՝ MA-ի լրագրողներ Դիրեն Յուրտսևերը, Բերիվան Ալթանը, Սելման Գյուզելյուզը, Հաքան Յալչընը, Էմրուլլահ Աջարը, Ջեյլան Շահինլին, Զեմո Աղգյոզը և Դենիզ Նազլըմը, ինչպես նաև JINNEWS-ի լրագրողներ Հաբիբե Էրենը և Օզնուր Դեղերը և նախկին մագիստրանտ Մեհմեթ Գյունհանը։
Անկարայի 4-րդ Բարձր քրեական դատարանը Էրենին, Շահինլիին և Գյունհանին արդարացրել է ահաբեկչական կազմակերպությանն անդամակցելու մեղադրանքով, իսկ մյուս ութ լրագրողներին դատապարտել ազատազրկման։
The Dicle Fırat լրագրողական ասոցիացիան (DFG) խստորեն դատապարտել է դատավճիռները։ Հայտարարության մեջ DFG-ն կառավարությանը մեղադրել է դատական միջոցներով լրագրողներին լռեցնելու փորձի մեջ։
«Նպատակն է՝ թույլ չտալ քուրդ լրագրողներին կատարել իրենց աշխատանքը: Լրագրողներին որպես «կազմակերպության անդամ» պիտակավորելը վկաների շինծու ցուցմունքների և հաղորդումների հիման վրա անընդունելի է։ Այս վճիռը մեսիջ է ուղարկու, որ քրդական հարցը լուսաբանող լրագրողները կպատժվեն»,- ասվում է հայտարարության մեջ։
Թուրքիայում քուրդ լրագրողները հաճախ են ենթարկվում իրավական ոտնձգությունների, կանգնում դատարանի առաջ և ենթարկվում ազատազրկման՝ քրդերի և PKK-ի հետ կապված հարցեր լուսաբանելու համար:
Իրավապաշտպան կազմակերպությունները պարբերաբար մեղադրում են Թուրքիային ԶԼՄ-ների ազատությունը խարխլելու մեջ՝ լրագրողներին ձերբակալելու և քննադատական լրատվամիջոցները փակելու միջոցով, որոնք ուժգնացել են հատկապես 2016 թվականի հուլիսին ձախողված հեղաշրջումից հետո:
Էմմա Չոբանյան
