22.11.2024 | 16:24
Հոկտեմբեր ամսվա տաք մեկնարկը և ցրտաշունչ ավարտը
Էրդողանի ու Ասադի՝ 13 տարվա ընթացքում առաջին հանդիպումը կարող է տեղի ունենալ ՌԴ-ում
Քաղաքականություն
05.07.2024 | 22:29
Թուրքիայի նախագահ Ռեջեփ Թայիփ Էրդողանն ու Սիրիայի նախագահ Բաշար ալ-Ասադը 13 տարի անց կարող են կրկին հանդիպել։ Սպասվում է, որ հանդիպումը տեղի կունենա Ռուսաստանում, Իրաքում կամ Պարսից ծոցի երկրներից մեկում, հայտնում է Turkiye-ն՝վկայակոչելով իր աղբյուրներին։
Մոսկվայում Թուրքիայի արտգործնախարար Հաքան Ֆիդանի շփումներից հետո ՌԴ նախագահ Վլադիմիր Պուտինը Դամասկոս է ուղարկել իր հատուկ ներկայացուցիչ Ալեքսանդր Լավրենտևին՝ հանձնարարելով համոզել Ասադին մասնակցել Շանհայի համագործակցության կազմակերպության հանդիպմանը։
Նշվում է, որ հանդիպումը կկայանա մինչև սեպտեմբեր, սակայն որտեղ՝ որոշված չէ։ Առանձնանում են Ռուսաստանը, Պարսից ծոցի երկրները և Իրաքը։ Սիրիան նախընտրում է Իրաքը։ Մյուս կողմից, Անկարան ցանկանում է, որ գործընթացը տեղի ունենա անաղմուկ, հանդիպումը լինի առաջնորդակենտրոն, ոչ թե պատվիրակությունների մակարդակով։ Նաև պահանջում է, որ հանդիպմանը չմասնակցի որևէ այլ երկիր։
Լրատվամիջոցը գրում է, որ երկիրը, որտեղ կկայանա հանդիպումը, պարզ կդառնա ՌԴ նախագահ Պուտինի Թուրքիա այցից հետո։
Մինչ հանդիպումը՝ երկու երկրները կստեղծեն փոխադարձ հանձնաժողովներ՝ ռազմական, քաղաքական, տնտեսական, ահաբեկչության և փախստականների հետ կապված հարցերը որոշելու համար։ Կողմերը կվերանայեն իրենց նախկին պահանջները։ Հանդիպման ամենակարևոր թեմաները լինելու են Սիրիայի ինքնիշխանությունը, փախստականների վերադարձը իրենց երկիր և PKK/YPG-ի հարցը։ Ըստ աղբյուրների՝ Դամասկոսը ցանկանում է, որ թուրք զինվորները հետ քաշվեն մի քանի կետերից՝ ի նշան բարի կամքի դրսևորման։
Օրերս Էրդողանը հնարավոր էր համարել Սիրիայի հետ հարաբերությունների կարգավորումը։
«Չկա պատճառ, թե ինչու դա չպետք է լինի: Այլ կերպ ասած՝ մենք միասին ենք գործելու Սիրիայի հետ հարաբերությունները զարգացնելու համար, ինչպես դա արել ենք անցյալում։ Մենք երբեք չենք ունեցել նպատակ՝ միջամտելու Սիրիայի ներքին գործերին»,- ասել էր Էրդողանը։
Նա հավելել էր, որ սիրիացիները եղբայրական ժողովուրդ են։
«Սիրիացի ժողովուրդը համայնք է, որի հետ մենք միասին ապրում ենք որպես եղբայր ժողովուրդներ: Ճիշտ այնպես, ինչպես մենք շատ լավ պահել հարաբերություններ ենք ունեցել Սիրիայի հետ, մենք նախկինում էլ ունեցել ենք հանդիպումներ պարոն Բաշար ալ-Ասադի հետ (Սիրիայի նախագահ), ներառյալ՝ ընտանեկան հանդիպումները: Անհնար է ասել, որ վաղը դա չի լինի, դա նորից կլինի»,- հայտարարել էր Թուրքիայի նախագահը։
Էմմա Չոբանյան
