20.12.2025 | 18:06
Ֆուտզալի միջազգային ընկերական մրցաշարի մասնակիցներից մեկը չի ժամանել Երևան
Հունգարիայի վարչապետը կայցելի Շուշի
Քաղաքականություն
04.07.2024 | 19:14
Հունգարիայի վարչապետ Վիկտոր Օրբանը պատրաստվում է այցելել Արցախի հայաթափված Շուշի քաղաք՝ մասնակցելու Թյուրքական պետությունների կազմակերպության ոչ պաշտոնական գագաթնաժողովին։ Այս մասին X-ում գրառմամբ հայտնել է Օրբանի մամուլի խոսնակ Զոլտան Կովաչը։
«Գագաթնաժողովը կկենտրոնանա տրանսպորտի, կապի և կլիմայի քաղաքականության միջոցով կայուն ապագայի կառուցման վրա: Վարչապետ Օրբանը երկկողմ բանակցություններ կվարի նաև գործընկեր թյուրքական պետությունների ղեկավարների հետ»,- ասվում է գրառման մեջ։
Հուլիսի 5-6-ն Ադրբեջանը պատրաստվում է Շուշիում անցկացնել Թյուրքական պետությունների կազմակերպության ոչ պաշտոնական գագաթնաժողովը։
Այսօր ավելի վաղ թուրքական լրատվամիջոցները հայտնել էին, որ Թուրքիայի նախագահ Ռեջեփ Թայիփ Էրդողանը չեղարկել է իր մասնակցությունը Շուշիում նախանշված գագաթնաժողովին։ Նա մտադիր է անձամբ մասնակցել հուլիսի 6-ին Բեռլինում կայանալիք ֆուտբոլի Եվրոպայի առաջնության քառորդ եզրափակչի՝ Թուրքիա-Նիդերլանդներ հանդիպմանը։
Էմմա Չոբանյան
