Հեղեղումներից տուժածների բնակարանի կամ տան կորուստն ամբողջովին կփոխհատուցվի

Կառավարությունը Լոռու և Տավուշի մարզերում հեղեղումներից տուժածների բնակարանի կամ տան կորուստն ամբողջովին կփոխհատուցի, նման որոշում է այսօր կայացվել կառավարության նիստում։

Նախագիծը ներկյացնելիս ՆԳ նախարար Վահե Ղազարյանը հայտնեց, որ 263 վնասված, փլուզված առանձնատներից 98-ի դեպքում 1 քառ մետր տարածքի վերանորոգման համար կտրամադրվի 60 հազար դրամ։

Իսկ երկրորդ գոտում գտնվող մյուս բնակարաններին կտրամադրվի 40 հազար դրամ։
Նա նաև նշեց, որ գույքի փոխհատուցման համար առաջին գոտու յուրաքանչյուր բնակարանին կտրվի 1 մլն 200 հազար դրամ, 2-րդ գոտում՝ 800 հազար դրամ և պարտադիր պայման է, որ այդ գումարի 60 %-ը ծախսվի անկանխիկ եղանակով։

Վարչապետ Նիկոլ Փաշինյանն ասաց, որ ստանդարտով են փոխհատուցում, որովհետև աղետի գոտում մի տան գույքը շատ է վնասվել, մյուսինը՝ քիչ, ստուգել չի լինի։
Վարչապետը հանձնախարարեց, որպեսզի փոխհատուցման գործընացն այնպես կազմակերպեն, որ մարդիկ քաշքշուկների մեջ չընկնեն։
Կառավարության մեկ այլ որոշմամբ էլ հեղեղումների պատճառով 4 մահացածների ընտանիքներից յուրաքանչյուրին կտրամադրվի 1-ական մլն դրամ աջակցություն։
Տուժած մյուս ընտանիքներին, մասնավորապես՝ Ալավերդի համայնքի և Նոյեմբերյան համայնքի Այրում բնակավայրի ընտանիքների յուրաքանչյուր անդամի հաշվարկով կտրամադրվի 60 000 դրամ։
Հիշեցնենք` մայիսի 26-ի տեղատարափ անձրևներից հետո Լոռու և Տավուշի մարզերում Դեբեդ, Աղստև և Տաշիր գետերի վարարման հետևանքով 4 մարդ մահացավ, բազմաթիվ տներ ջրածածկ եղան, վնասվեցին ճանապարհներ, կամուրջներ։
Կառավարության որոշմամբ Լոռու և Տավուշի մարզերի տուժած բնակավայրերը հայտարարվեցին աղետի գոտի։