Տնտեսություն
04.07.2024 | 11:59
Գործադիրը չզեկուցվող հարցերի փաթեթով հավանություն տվեց «Հայաստանի Հանրապետության ու Վերակառուցման և զարգացման եվրոպական բանկի միջև Սյունիքի մաքսային և լոգիստիկ կենտրոն դրամաշնորհային համաձայնագիրը հաստատելու մասին» Հայաստանի Հանրապետության նախագահի հրամանագրի նախագծին:
Հայաստանի ու Վերակառուցման և զարգացման եվրոպական բանկի միջև մայիսի 14-ին ստորագրվել է 2 մլն եվրո արժողությամբ «Սյունիքի մաքսային և լոգիստիկ կենտրոն» դրամաշնորհային համաձայնագիրը։
Ըստ կառավարության հիմնավորման՝ ծրագրի նպատակն է Սիսիանից 7 կմ հեռավորության վրա՝ Հյուսիս-հարավ ավտոմոբիլային միջանցքին հարող 7.7 հա հողատարածքում մաքսային և լոգիստիկ կենտրոն կառուցել, դրա տեխնիկական ապահովումն ու ծրագրի իրականացման աջակցության խորհրդատվական ծառայություններ մատուցել: Ծրագրի իրականացման համար ՎԶԵԲ-ից ներգրավվելու են վարկային միջոցներ 10 մլն եվրոյի չափով:
Ծրագրի շրջանակներում նախատեսվում է կառուցել վարչական շենք՝ տանիքում արևային էներգակայանով:
Կենտրոնի տարածքում լինելու են մուտքի և ելքի ուղղությամբ տրանսպորտի մանրամասն զննման, մաքսային ձևակերպումների, բեռնատար տրանսպորտի ռենտգենային զննման մասնաշենքեր, մարդատար տրանսպորտի ռենտգենյան զննման հարթակ և այլ ենթակառուցվածքներ: Մուտքի և ելքի ուղղությամբ նախատեսված են 5 ուղեգիծ և 2 կշեռք՝ 100 տոննա կշռողությամբ:
