20.06.2026 | 19:55
Նյու Յորքում հրդեհ է բռնկվել պատմական հուշարձանի կարգավիճակ ունեցող եկեղեցում, փլուզվել է զանգակատունը
40 մլն դրամի արտոնություն՝ Մելիք Մանուկյանի ընկերությանը
Տնտեսություն
04.07.2024 | 10:36
Հայաստանի կառավարությունը 40 մլն դրամի մաքսային արտոնություն է տալիս Շշի Մելո մականվամբ հայտնի գործարար, ԲՀԿ-ական նախկին պատգամավոր Մելիք Մանուկյանի ընկերությանը։ Էկոնոմիկայի նախարարության հեղինակած նախագծից Factor.am-ը տեղեկանում է, որ «Սարանիստ» ընկերությունը դիմել է ՀՀ կառավարությանը և հայտնել, որ պատրաստվում է 800 մլն դրամի ներդրում կատարել, իսկ սարքավորումները ներկրելու է ոչ ԵՏՄ անդամ պետություններից։
Մանուկյանի ընկերությունը զբաղվում է ապակու արտադրությամբ։ Ակնկալելով կառավարության մաքսային արտոնությունը ՝«Սարանիստ» ՍՊԸ-ն խոստանում է առկա 590 աշխատատեղը մինչև 2025 թվականը հասցնել 630-ի, իսկ 365 հազար դրամ աշխատավարձը՝ 380 հազար դրամի։
Էկոնոմիկայի նախարարության հիմնավորումն այն է, որ արտոնության առկայությունը լուրջ խթան կհանդիսանա նոր ներդրումային ծրագրերի իրականացման և նոր աշխատատեղերի ստեղծման համար։ Թեև նկատենք, որ գերատեսչությունը արտոնությունների տրամադրումից հետո հարկատուներին տեղեկություն չի տրամադրում՝ արդյո՞ք սահմանված ժամկետներում ներդրումներն իրականացվել են ամբողջ ծավալով, ստեղծվել են նոր աշխատատեղեր կամ եղել է աշխատավարձերի բարձրացում։
Կառավարությունն այս ընկերությանը 43 մլն դրամի մաքսային արտոնություն էլ տրամադրել էր 2023 թվականին։
Նիկոլ Փաշինյանը 2021 թվականի ամռանն անձամբ էր այցելել այս ընկերության արտադրամաս։ Վարչապետի այցի վերաբերյալ պաշտոնական հաղորդագրությունում շեշտվել էր, որ Փաշինյանին դիմավորել ու արտադրությանը ծանոթացրել էր ընկերության սեփականատեր Մելիք Մանուկյանը։
Մանուկյանը չնայած 2018 թվականին ԱԺ պատգամավոր էր ընտրվել Գագիկ Ծառուկյանի ղեկավարած «Ծառուկյան» խմբակցությունից, սակայն, աջակցում էր Սերժ Սարգսյանին։ Այդ ժամանակահատվածում, երբ Սերժ Սարգսյանն իր խոստումը դրժելով պատրաստվում էր առաջադրվել վարչապետի թեկնածու, Մանուկյանը հայտարարում էր, որ «Սերժ Սարգսյանը հրաշալի ղեկավար է»։
Նարեկ Կիրակոսյան
