30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ինչ են քննարկել Էրդողանն ու Պուտինը
Քաղաքականություն
03.07.2024 | 21:13
Աստանայում ՇՀԿ-ի գագաթնաժողովում Թուրքիայի նախագահ Ռեջեփ Թայիփ Էրդողանի և Ռուսաստանի նախագահ Վլադիմիր Պուտինի հանդիպման ընթացքում քննարկվել են երկկողմ հարաբերությունների վիճակը, ՌԴ-ի և Ուկրաինայի միջև հակամարտության շուրջ ստեղծված իրավիճակը, Պաղեստինի դեմ Իսրայելի ագրեսիան, սիրիական կարգավորումը և ահաբեկչության դեմ պայքարի հարցերը:
«Անադոլու» գործակալության փոխանցմամբ՝ այս մասին ասվում է Թուրքիայի նախագահի աշխատակազմի կապերի վարչության տարածած հաղորդագրության մեջ ։
Թուրքիայի ղեկավարն ընդգծել է, որ Անկարան շարունակելու է ջանքեր գործադրել տարածաշրջանային և գլոբալ կայունության ապահովման համար:
«Նախագահ Էրդողանը նշել է, որ Թուրքիան կարող է հող ձևավորել հրադադարի համաձայնագրի, ապա նաև Ռուսաստանի և Ուկրաինայի միջև խաղաղության հասնելու համար: Նա վստահություն է հայտնել, որ հնարավոր կլինի արդար կարգավորում, որը կբավարարի երկու կողմերին:
Պետության ղեկավարն ընդգծել է, որ Իսրայելի հարձակումները պաղեստինյան տարածքի վրա և Թել Ավիվի սպառնալիքները Լիբանանի հասցեին սպառնում են տարածաշրջանային և գլոբալ խաղաղությանն ու կայունությանը: Նրա խոսքով ՝ հակամարտության տարածումը ամենամեծ վնասը կհասցնի տարածաշրջանի երկրներին։ Թուրքիայի նախագահը միջազգային հանրությանը կոչ է արել «ջանքերը կենտրոնացնել Իսրայելին կանգնեցնելու վրա»:
Անդրադառնալով ահաբեկչության դեմ պայքարի թեմային ՝ Էրդողանն ընդգծել է, որ Թուրքիան վճռական է իր սահմանների մոտ ահաբեկչական պետության ստեղծումը թույլ չտալու հարցում:
Նա ընդգծել է ահաբեկչական կազմակերպությունների, մասնավորապես, Սիրիայում քաղաքացիական պատերազմի համար բարենպաստ միջավայր ստեղծող անկայունության դադարեցման համար կոնկրետ միջոցների ձեռնարկման կարևորությունը: Նախագահ Էրդողանը հայտնել է այդ ուղղությամբ համագործակցելու Թուրքիայի պատրաստակամությունը»,- ասված է հաղորդագրության մեջ:
