05.07.2024 | 23:30
Թուրքիայում 8 քուրդ լրագրողներ դատապարտվել են ավելի քան 6 տարվա ազատազրկման
Զելենսկին հայտարարել է, որ Ուկրաինան քննարկում է ԵՄ ադրբեջանական գազի տարանցման հարցը
Քաղաքականություն
03.07.2024 | 19:49
Ուկրաինայի նախագահ Վլադիմիր Զելենսկին հաստատել է, որ Ուկրաինան բանակցություններ է վարում Ադրբեջանից Եվրամիություն բնական գազի մատակարարման շուրջ, որպեսզի պահպանի իր դերը որպես տարանցիկ երկիր և օգնի իր արևմտյան հարևաններին ապահովել էներգետիկ անվտանգությունը։ Այս մասին հայտնում է Bloomberg-ը, որին վկայակոչում են ուկրաիանական լրատվամիջոցները։
Զելենսկին Bloomberg TV-ին ասել է, որ ռուսական գազն ադրբեջանականով փոխարինելու համաձայնագիրն այժմ քննարկման առաջնահերթություններից է։
«Այժմ դիտարկվում են այլընտրանքային քայլերը, թե ինչպես կարող ենք գազատարն օգտագործել մեկ այլ երկրի հետ, բանակցություններ են ընթանում»,- ասել է Զելենսկին։
Նա ընդգծել է, որ Ուկրաինան չի ցանկանում երկարաձգել Ռուսաստանի Դաշնության հետ գազային պայմանագիրը։
«Մենք չենք ուզում, որ նրանք այստեղ փող աշխատեն։ Եթե դա սովորական պայմանագիր է ոչ ռուսական գազի մատակարարման մասին եվրոպական երկրներին, որոնք մեզ դուր են գալիս, ապա մենք, որպես ԵՄ ապագա անդամ, պետք է աջակցենք մեր ընկերներին»,- ասել է նա։
Ավելի վաղ Bloomberg-ը հայտնել էր, որ ԵՄ պաշտոնյաները բանակցություններ են վարում 2025 թվականին Ռուսաստան-Ուկրաինա առանցքային խողովակաշարով գազի մատակարարումների շարունակման շուրջ: Նշվում էր, որ քննարկվող տարբերակներից մեկն այն է, որ եվրոպական ընկերությունները գազ գնեն Ադրբեջանից և այն մղեն Եվրոպա գնացող ռուսական խողովակաշարեր։
«Նման համաձայնությունը թույլ կտար Եվրոպային խուսափել ռուսական գազ գնելու անհարմարությունից այն ժամանակ, երբ նա փորձում է կրճատել Մոսկվայի եկամուտները»,- նշել էր լրատվամիջոցը։
Ըստ Bloomberg-ի՝ համապատասխան բանակցությունների արդյունքները, որոնք դեռ վաղ փուլում են, պետք է ակնկալել 2024 թվականի վերջին,երբ ճնշումը մեծանա Ուկրաինայի հետ ռուսական գազի տարանցման պայմանագրի ժամկետի ավարտի մոտենալու ֆոնին և եվրոպական ձմեռը մոտ կլինի։
Նշենք, որ այս լուրերի ֆոնին՝ Ադրբեջանի պետական նավթային SOCAR ընկերության նախագահ Ռովշան Նաջաֆը և ռուսական «Գազպրոմ»-ի խորհրդի նախագահ Ալեքսեյ Միլլերը բավական հաճախ բանակցություններ են անցկացնում։ Մասնավորապես, 2024 թվականին նրանք հանդիպել են արդեն 3 անգամ։
Էմմա Չոբանյան
