Թրամփի դատավճռի հրապարակումը հետաձգվել է երկու ամսով

Նյու Յորք նահանգի Գերագույն դատարանի դատավոր Խուան Մերչանը մինչև սեպտեմբերի 18-ը հետաձգել է ԱՄՆ նախկին նախագահ Դոնալդ Թրամփի դատավճռի հրապարակումը պոռնոդերասանուհու անօրինական վճարումների վերաբերյալ քրեական գործով։ Այս մասին հայտնել է NBC News-ը, որին վկայակոչում է DW-ի ռուսական ծառայությունը։

Այսպիսով՝ այս գործով Թրամփի դատավճիռը հրապարակվելու է նախագահական ընտրություններից երկու ամիս առաջ և հուլիսի 15-ին մեկնարկող հանրապետականների ազգային կոնվենցիայի կողմից նախագահի թեկնածուի պաշտոնական առաջադրումից հետո։

Հաղորդվում է, որ դատավճռի հրապարակման հետաձգման խնդրով դիմել են փաստաբանները, որոնց ավելի շատ ժամանակ է պետք՝ ուսումնասիրելու, թե ինչպես կարող է դատավարության վրա ազդել ԱՄՆ Գերագույն դատարանի որոշումը, որը Թրամփին մասնակի անձեռնմխելիություն է շնորհում քրեական հետապնդումից 2021 թվականի հունվարի Կապիտոլիումի գրոհի համար։

Հուլիսի 1-ին Գերագույն դատարանը, որի 9-ը դատավորներից 6-ը պահպանողականներ են՝ նշանակված հանրապետականների կողմից, որոշել էր, որ Դոնալդ Թրամփը բացարձակ անձեռնմխելիություն ունի, երբ խոսքը վերաբերում է իր սահմանադրական լիազորությունների շրջանակում կատարած գործողություններին:

Միևնույն ժամանակ, սա չի տարածվում որպես մասնավոր անձ «ոչ պաշտոնապես» կատարված գործողությունների վրա։ Բացի այդ, ԱՄՆ Գերագույն դատարանը ստորադաս դատարանին է թողել Թրամփի՝ որպես պաշտոնական և ոչ պաշտոնական անձի գործողությունները տարանջատելու իրավունքը։

Նախկին նախագահը Գերագույն դատարանի որոշումն անվանել էր «Սահմանադրության և ժողովրդավարության մեծ հաղթանակ»:

Մինչդեռ, ԱՄՆ նախագահ Ջո Բայդենը քննադատել է Գերագույն դատարանի որոշումը՝ այն անվանելով «վտանգավոր նախադեպ»։

«Գործնական տեսանկյունից այս որոշումը նշանակում է, որ այլևս սահմանափակումներ չկան այն բանի համար, ինչ թույլատրվում է անել նախագահին»,- ասել է Բայդենը։