08.12.2025 | 15:55
Վարդենիսում զինծառայող է մահացել․ ՀՀ ՊՆ
ԱՄՆ Պետդեպը՝ Ադրբեջանում քաղբանտարկյալների և Բաքվի հետ շարունակվող բարձր մակարդակի շփումների մասին
Քաղաքականություն
02.07.2024 | 16:43
ԱՄՆ Պետքարտուղարության մամուլի փոխխոսնակ Վեդանտ Պատելը ճեպազրույցում անդրադարձել է Ադրբեջանի հետ բարձր մակարդակով շարունակվող շփումներին՝ երկրում քաղբանտարկյալներին ազատ չարձակելու ֆոնին։ Հարցին, որ Բաքվի հետ բարձր մակարդակի բանակցություններ են եղել, պետքարտուղար Էնթոնի Բլինքենը հեռախոսազրույց է ունեցել Ադրբեջանի նախագահ Իլհամ Ալիևի հետ, անցյալ շաբաթ էլ պետքարտուղարի տեղակալ Ջեյմս Օ՛Բրայենը Բաքվում էր, արդյոք՞ մտահոգություն չկա այն առումով, որ նման բարձր մակարդակի ներգրավվածությունը շարունակվում է առանց քաղբանտարկյալների ազատ արձակումն ապահովելու, Պատելը պատասխանել է, որ գործընթացը պահանջում է շարունակական ներգրավվածություն։
«Սա երկար գործընթաց է, և այն պահանջում է շարունակական ներգրավվածություն։ Ակնկալում եմ, որ թե՛ պետքարտուղարը, թե՛ պետքարտուղարի օգնական Օ՛Բրայենն ու մյուսները կշարունակեն կենտրոնանալ այդ ուղղությամբ»,- ասել է պաշտոնյան։
Հավելենք, որ «Ադրբեջանի քաղբանտարկյալների ազատության միությունը» օրերս հրապարակել էր երկրում քաղբանտարկյալների նոր ցուցակը, որում ներառված է 303 մարդ։ Նախորդ ցուցակի համեմատ՝ քաղբանտարկյալների թիվն ավելացել է 16-ով։ 2000-ականների սկզբից ի վեր առաջին անգամ Ադրբեջանում քաղբանտարկյալների թիվը գերազանցել է 300-ը։
Նախորդ տարվա վերջին ամիսներից Ադրբեջանում մաքսանենգության մեղադրանքով ձերբակալվել են տարբեր լրատվամիջոցներ ներկայացնող երկու տասնյակից ավելի լրագրողներ, ընդդիմադիր գործիչներ ու քաղաքական ակտիվիստներ։ Միջազգային կազմակերպությունները, այդ թվում՝ ԱՄՆ Պետքարտուղարությունը, ԵՄ-ն պարբերաբար կոչ են անում Ադրբեջանի իշխանություններին վերջ տալ երկրում բռնաճնշումների ալիքին և ազատ արձակել անարդարացի բանտարկվածներին։
