11.01.2025 | 20:13
Կրակը Գլենդելից հեռու է. քաղաքապետը մանրամասներ է ներկայացրել
«Վասիլի Պետրենկոյի դիրիժորական ակադեմիա» ծրագրին մասնակցության հայտեր են ներկայացրել 15 երկրից. ԿԳՄՍՆ
Մշակույթ
02.07.2024 | 12:17
Հայաստանում առաջին անգամ տեղի կունենա տարածաշրջանի համար բացառիկ մի իրադարձություն. մեկնարկում է միջազգային մեծ ճանաչում ունեցող «Վասիլի Պետրենկոյի դիրիժորական ակադեմիա» ծրագիրը. տեղեկացնում են ԿԳՄՍՆ-ից։
Ծրագրի կազմակերպիչներն են ՀՀ կրթության, գիտության, մշակույթի և սպորտի նախարարության ենթակայության Հայաստանի ազգային ֆիլհարմոնիկ նվագախումբը (գեղարվեստական ղեկավար և գլխավոր դիրիժոր` Էդուարդ Թոփչյան) և Primavera Foundation of Armenia հիմնադրամը (գեղարվեստական խորհրդի նախագահ` Վասիլի Պետրենկո):
«Վասիլի Պետրենկոյի դիրիժորական ակադեմիա» ծրագիրը կանցկացվի 2024 թվականի հուլիսի 2-6-ը: Դասընթացները նախատեսված են երիտասարդ դիրիժորների համար, որոնք կունենան անհատական փորձեր սիմֆոնիկ նվագախմբի հետ և կմասնակցեն «Դիրիժորական աշխատանքի գաղտնիքները՝ բեմից դուրս» սեմինարին: Նվագախմբային փորձերը և սեմինարը կվարի Վասիլի Պետրենկոն: Դասընթացների ավարտին մասնակիցները մաեստրո Պետրենկոյի հետ «Արամ Խաչատրյան›» համերգասրահում կմասնակցեն գալա-համերգին: Դասընթացների և համերգի մուտքն ազատ է ունկնդիրների համար:
Ակադեմիային մասնակցության հայտեր են ներկայացրել 15 երկրից. ընտրվել են 6 երիտասարդ դիրիժորներ, որոնք ներկայացնում են ԱՄՆ-ն, Չինաստանը, Մեքսիկան, Ռուսաստանը, Իրան-Հայաստանը և Նորվեգիա-Ուկրաինան: Նրանք կաշխատեն նախապես կազմված ծրագրի վրա՝ ներկայացնելով Հայդնի, Մոցարտի, Բեթհովենի, Բրամսի, Վեբերի, Մենդելսոնի, Պրոկոֆևի և Ստրավինսկու ստեղծագործությունները:
Դասընթացների և գալա համերգի համար կազմավորվել է հատուկ նվագախումբ: Հայաստանի ազգային ֆիլհարմոնիկ նվագախմբի առաջատար երաժիշտների մասնակցությամբ և հովանու ներքո նվագախմբի կազմում հանդես կգան Kandinsky նվագախմբի (գեղարվեստական ղեկավար և գլխավոր դիրիժոր՝ Քահվե Սյուլե) և ErazArt ծրագրի երաժիշտները:
«Ակադեմիան երիտասարդ դիրիժորներին հնարավորություն կտա պրակտիկ համատեղ աշխատանք ունենալ ավելի փորձառու և հարուստ ճանապարհ անցած մասնագետի հետ, աշխատել իրական սիմֆոնիկ նվագախմբի հետ: Ինձ համար ակադեմիան հաջորդ սերնդի տաղանդավոր դիրիժորների աճի, կատարելագործման և հնարավորությունների ընձեռման միջոց է»,- նշել է Մաեստրո Պետրենկոն:
«Վասիլի Պետրենկոյի դիրիժորական ակադեմիան» տարածաշրջանի համար նախադեպը չունեցող ամենամյա կրթական ծրագիր է, որը մեծ փորձառություն և խթան կհանդիսանա երիտասարդ դիրիժորների համար:
Պետրենկոն նաև հանդես կգա առանձին համերգով՝ հուլիսի 5-ին ղեկավարելով Հայաստանի ազգային ֆիլհարմոնիկ նվագախումբը: Համերգի մենակատարն է հանրահայտ ջութակահար Սերգեյ Դոգադինը. նա կկատարի Մենդելսոնի Ջութակի կոնցերտը, կհնչեն նաև Վեբերի «Էվրիանտե» նախերգանքը և Դվորժակի Սիմֆոնիա թիվ 8-ը:
Նշենք, որ Վասիլի Պետրենկոն հանդիսանում է Լոնդոնի Թագավորական ֆիլհարմոնիկ նվագախմբի երաժշտական ղեկավարը (2021 թվականից) և Եվրոպական միության երիտասարդական նվագախմբի գլխավոր դիրիժորը (2015 թվականից): 15 տարի լինելով Լիվերփուլի թագավորական ֆիլհարմոնիկի գլխավոր դիրիժորը՝ այժմ հանդիսանում է վերջինիս դափնեկիր դիրիժորը: Եղել է Ռուսաստանի պետական ակադեմիական սիմֆոնիկ նվագախմբի գլխավոր դիրիժորն ու գեղարվեստական ղեկավարը (2016–2022 թթ.), Օսլոյի ֆիլհարմոնիկի, Մեծ Բրիտանիայի ազգային երիտասարդական նվագախմբի գլխավոր դիրիժորը (2013–2020 թթ.): Ելույթներ է ունեցել Բեռլինի ֆիլհարմոնիկ, Լայպցիգի Գևանդհաուս, Լոնդոնի սիմֆոնիկ, Լոնդոնի ֆիլհարմոնիկ, Սանտա Չեչիլիայի ակադեմիայի, Ֆրանսիայի ազգային նվագախմբերի հետ, ԱՄՆ-ում՝ Բոստոնի, Չիկագոյի, Լոս Անջելեսի ֆիլհարմոնիկ և այլ նվագախմբերի հետ:
Հանդես է եկել BBC Proms, Էդինբուրգի, Գրաֆենեգգի փառատոներում: Պետրենկոյի երկացանկում կան մոտ 30 օպերային ստեղծագործություններ, որոնք նա ղեկավարել է Նյու Յորքի Մետրոպոլիտեն, Փարիզի ազգային, Ցյուրիխի, Բավարիայի և Միխաիլովյան օպերային թատրոններում և Գլայնդեբուրնի փառատոնում:
Պետրենկոն ավարտել է Սանկտ Պետերբուրգի կոնսերվատորիան, որտեղ դասեր է վերցրել դիրիժորական արվեստի այնպիսի հսկաներից, ինչպիսիք են Իլյա Մուսինը, Մարիս Յանսոնսը և Յուրի Տեմիրկանովը:
