Տարեսկզբից Ադրբեջանը 19 զինվորականի կորուստ ունի․ զեկույց

Կասպյան Ռազմական հետազոտությունների ինստիտուտը (CDSİ) հրապարակել է վիճակագրական զեկույց 2024 թվականի առաջին կիսամյակում Ադրբեջանի անվտանգության և պաշտպանության ոլորտի կորուստների վերաբերյալ։ Նշված ժամանակահատվածում ադրբեջանական բանակի և անվտանգության այլ կառույցների անդառնալի կորուստները կազմել են 19 զինծառայող։

Զեկույցում ասվում է, որ նրանցից 17-ը մահացել են ոչ մարտական ​​պայմաններում, 2-ը մահացել են 2023 թվականի սեպտեմբերին Արցախում դեմ իրականացրած ագրեսիայի ժամանակ ստացած վիրավորումներից։

Ոչ մարտական ​​կորուստներից՝ 5 զինծառայողներ մահացել են ավտովթարի, 4-ը՝ տարբեր պատահարների հետևանքով, 3 հոգի մահացել է հիվանդություններից, 3-ը ինքնասպանություն է գործել, 1 զինծառայող մահացել է «ապօրինի գործողության» հետևանքով, ևս 1-ը՝ «անհայտ պատճառներով»։

Զոհված զինծառայողներից 17-ը ծառայել են ՊՆ ստորաբաժանումներում, 2-ը՝ Պետական ​​սահմանային ծառայությունում։ Մահացածներից 11-ը շարքային զինծառայողներ են, 7-ը՝ սպա, 1-ը՝ ենթասպա։

2024 թվականի առաջին կիսամյակում վիրավորվել է առնվազն 18 զինվորական։ Նրանցից 15-ը տուժել է ճանապարհատրանսպորտային պատահարներից, 1-ը թունավորվել է։ Նշվում է, թե հայկական կողմի կրակոցներից 2 զինվոր է վիրավորվել։

Նշենք, որ ավելի վաղ էլ ինստիտուտը հրապարակել էր 2023 թվականին Ադրբեջանի անվտանգության և պաշտպանության ոլորտի մոնիթորինգի արդյունքները։ Հաղորդվում է, որ Ադրբեջանի ԶՈՒ-ն առնվազն 260 զինծառայողի կորուստ է ունեցել։ Նրանցից 212-ը մարտական ​​կորուստներ են, 48-ը՝ ոչ մարտական։

Էմմա Չոբանյան