Ուկրաինան հերքում է Բելառուսի հետ սահմանին ռազմական ներկայությունն ուժեղացնելու լուրերը

Ուկրաինայի սահմանապահ ծառայությունը հերքել է տեղեկություններն այն մասին, որ Կիևն ուժեղացնում է իր ռազմական ներկայությունը Բելառուսի հետ սահմանին՝ դրանք անվանելով «տեղեկատվական արշավի ևս մեկ փուլ», որն իրականացվում է Մինսկի կողմից՝ Մոսկվայի աջակցությամբ, գրում է BBC-ի ռուսական ծառայությունը։

Մինսկն անցյալ շաբաթ հայտարարել էր, թե Կիևը մեծացնում է իր ռազմական ներկայությունը ուկրաինա-բելառուսական սահմանի երկայնքով: Երկուշաբթի Կրեմլը հայտարարել է, որ այս  հայտարարությունն անհանգստության տեղիք է տվել:

«Բելառուսն առաջին անգամ չէ, որ տեղեկատվություն է հրապարակում, թե Ուկրաինան վտանգ է ներկայացնում և ուժեղանում է։ Սա Բելառուսի կողմից Ռուսաստանի աջակցությամբ իրականացվող տեղեկատվական օպերացիայի մաս է»,- ասել է սահմանապահ ծառայության մամուլի խոսնակ Անդրեյ Դեմչենկոն Ուկրաինայի ազգային հեռուստատեսությանը։

Նա նշել է, որ նման հայտարարություններն առաջին անգամ չեն հնչում։ Ըստ խոսնակի՝ հունիսի 21-ից Մինսկը ստուգում է իր ստորաբաժանումների մարտունակությունը, ուստի դա կարող է լինել «Ուկրաինայի վրա  պատասխանատվությունը բարդելու բաղադրիչներից մեկը»։

Դեմչենկոն ասել է նաև, որ Բելառուսի հետ սահմանային շրջանը շարունակում է մնալ «սպառնալիք», և Ուկրաինան այնտեղ է պահում անհրաժեշտ թվով ուժեր՝ կանխելու ցանկացած սադրանք։

Անցյալ շաբաթ Բելառուսի Պետական ​​սահմանային կոմիտեն հայտարարել էր, որ Ժիտոմիրի շրջանում, ուկրաինացի սահմանապահների պատասխանատվության գոտում, ռուսական կամավորական կորպուսի ստորաբաժանումները, իբր, հետախուզություն են իրականացնում, այդ թվում՝ դուրս գալով Բելառուսի սահման։

Բելառուսի պաշտպանության նախարարությունը հայտնել էր, որ «ուկրաինական սպառնալիքից» պաշտպանվելու համար սահմանին մարտական ​​հերթապահության է բերել Պոլոնեզ համակարգը։