Բելգորոդը հոսանքազրկվել է․ Կուրսկի շրջանում նույնպես հնարավոր են էլեկտրաէներգիայի հետ կապված խնդիրներ

Բելգորոդ քաղաքում և Բելգորոդի շրջանի մի շարք բնակավայրերում էլեկտրաէներգիայի մատակարարման, ինչպես նաև ջրամատակարարման հետ կապված խնդիրներ կան։ Այս մասին հայտնում են տեղական իշխանությունները, գրում է Meduza-ն։

Ըստ ՌԻԱ Նովոստիի՝ Բելգորոդում լուսացույցներն անջատվել են, խնդիրներ կան նաև ինտերնետի հետ կապված։ Հաղորդվում է մի շարք բնակավայրերում ջրամատակարարման անջատման մասին։ Ջրմուղում ջրի բացակայությունը բացատրվել է վթարային հոսանքազրկմամբ։

Տեղի իշխանությունները հայտնել են, որ էլեկտրաէներգիայի անջատման ժամանակ որոշ հատվածներում կօգտագործվեն շարժական բարձրախոսներ՝ նախազգուշացնելու հրթիռների վտանգի մասին:

«Բելգորոդէներգոյից» հայտնել են, որ էլեկտրաէներգիան անջատվել է «էլեկտրակայանի վրա արտաքին ազդեցության» հետևանքով առաջացած տեխնոլոգիական անսարքության պատճառով։ Չի նշվում, սակայն, թե որ էլեկտրակայանն է վնասվել։ Նախնական տվյալներով՝ հոսանքազրկման պատճառը ենթակայանի վրա ԱԹՍ-ների հարձակումն է եղել։

Կուրսկի նահանգապետի պաշտոնակատար Ալեքսեյ Սմիրնովն էլ հայտնել է, որ այս տարածաշրջանում նույնպես կարող են էլեկտրաէներգիայի հետ կապված խնդիրներ լինել այն բանից հետո, երբ Բելգորոդում անօդաչու թռչող սարքի հարձակումից հետո էլեկտրաէներգիայի անջատումներ են գրանցվել։

«Հարևան շրջաններում էլեկտրահաղորդման գծերի տեխնոլոգիական խախտումների պատճառով Կուրսկի մարզում կարող է առաջանալ էլեկտրաէներգիայի հզորության պակաս»,- գրել է նա տելեգրամի իր ալիքում։

Վորոնեժի շրջանի իշխանություններն էլ հայտնել են մի շարք շրջաններում գերծանրաբեռնվածության պատճառով էլեկտրամատակարարման սահմանափակման մասին։