Հայաստանի ռազմականացումը չի ծառայում տարածաշրջանում խաղաղությանը․ Բայրամովը՝ Օ՛Բրայենին

Ադրբեջանի ԱԳ նախարար Ջեյհուն Բայրամովը Բաքվում գտնվող ԱՄՆ պետքարտուղարի Եվրոպայի ու Եվրասիայի հարցերով տեղակալ Ջեյմս Օ՛Բրայենի հետ հանդիպմանը քննարկել է երկկողմ և բազմակողմ օրակարգային հարցեր, Ադրբեջանի և Հայաստանի միջև երկկողմ հարաբերությունների կարգավորման գործընթացի ներկա իրավիճակն ու հեռանկարները, ինչպես նաև տարածաշրջանային խնդիրներ:

Ադրբեջանական կողմի հաղորդմամբ՝ հանդիպմանը նշվել է «պատմական հարաբերությունների և մի շարք ուղղություններով փոխադարձ շահերի շրջանակներում Ադրբեջանի և ԱՄՆ-ի միջև երկկողմ հարաբերությունների զարգացման կարևորությունը»։

Նշվում է, որ Բայրամովը տեղեկացրել է «հետհակամարտային շրջանում տարածաշրջանում տիրող իրավիճակի, Ադրբեջանի և Հայաստանի միջև խաղաղության համաձայնագրի շուրջ բանակցությունների մասին»։ Նա ասել է, թե «Ադրբեջանը, որպես Հայաստանի հետ խաղաղության գործընթացի հիմնական տարրերի նախաձեռնող, շահագրգիռ կողմ է տարածաշրջանում խաղաղության և կայունության հաստատման գործում»։

«Ձեռք բերված զգալի առաջընթացին զուգահեռ՝ ընդգծվել է Հայաստանի Սահմանադրությամբ և օրենսդրական ակտերում Ադրբեջանի տարածքային ամբողջականության և ինքնիշխանության վերաբերյալ շարունակվող պահանջներից հրաժարվելու և Սահմանադրությունում փոփոխություններ մտցնելու կարևորությունը։ Նշվել է, որ Հայաստանի ռազմականացման քաղաքականությունը չի ծառայում տարածաշրջանում խաղաղությանն ու կայունությանը»,- ասվում է հաղորդագրության մեջ։