Բագրատ արքեպիսկոպոս Գալստանյանը Սյունիքում է

«Տավուշը հանուն հայրենիքի շարժման» անդամները Բագրատ արքեպիսկոպոս Գալստանյանի գլխավորության մեկնել են Սյունիքի մարզ, նրանք եռօրյա այցի շրջանակներում կլինեն մարզի մի շարք համայնքներում։

Մարզի բնակիչների հետ հանդիպմանը Գալստանյանն ասել է, թե բոլորի ցանկությունն այն է, որ «Սյունիքի դարպասները երբեք թշնամի չտեսնե»ն:

Բագրատ արքեպիսկոպոս Գալստանյանը սյունեցիների հետ խոսել է շարժման ընթացքից, արձագանքել նաև շարժման մարման վերաբերյալ պնդումներին։

«Ինչքան էլ մարդիկ ասեն, որ շարժումը մարում է, մարել է, իրենք գիտեն, որ ուրիշ բանի մասին է էս շարժումը, ոչ մեկի իմացածի մասին չէ, սա չարի դեմ պայքարի մասին է»,- ասել է Գալստանյանը՝ հավելելով՝ ուզում է, որ շարժումը բոլորի անձնականը դառնա։

Հիշեցնենք, որ հունիսի 19-ին կայացած ասուլիսի ժամանակ շարժման առաջնորդ Բագրատ արքեպիսկոպոս Գալստանյանը հայտարարել էր, որ «Տավուշը հանուն հայրենիքի» շարժումը պայքարի վերադասավորման փուլում է, ներքին կազմակերպչական վերադասավորումներ են տեղի ունենում։

Նա միևնույն ժամանակ հավելել էր, որ առաջիկա ամիսներին հրապարակը չեն լքելու։

Մայիսի 4-ին «Տավուշը հանուն հայրենիքի» շարժումը երթ էր սկսել դեպի Երևան, ուր հասել էին մայիսի 9-ին և նույն օրն անցկացրել առաջին հանրահավաքը՝ հայտարարելով, որ պատրաստվում են ԱԺ-ում Փաշինյանի նկատմամբ անվստահության գործընթաց սկսել։ Մայիսի 26-ին «Տավուշը հանուն հայրենիքի» շարժումը հանրահավաք էր իրականացրել, որի ընթացքում հայտարարել էին, որ վարչապետի իրենց թեկնածուն Բագրատ արքեպիսկոպոս Գալստանյանն է։ Շարժումը պահանջել էր վարչապետ Նիկոլ Փաշինյանի հրաժարականը՝ հայտարարելով մայիսի 27-ից անհնազանդության ակցիաներ սկսելու մասին։

Հունիսի 10-ին ցուցարարները վրաններ էին տեղադրել Ազգային ժողովի դիմաց՝ փակելով Բաղրամյան պողոտան։ Հունիսի 12-ին ԱԺ շենքի մոտ տեղի ունեցած հավաքն ավարտվել էր բախումներով։ Ոստիկանությունը հատուկ միջոցներ էր կիրառել, ինչի հետևանքով տուժել էր 101 քաղաքացիական անձ և ոստիկան։

Քննչական կոմիտեն բախումների առթիվ քրեական վարույթ էր նախաձեռնել։ Հունիսի 14-ին ցուցարարները վրանները հանել էին Բաղրամյան պողոտայից, և երթևեկությունը վերականգնվել էր։