Վրաստանի իշխանությունների ներկայիս կուրսը մոտեցնում է ԵՄ անդամակցության գործընթացի կասեցմանը․ Եվրոպական խորհրդի հայտարարությունը

Եվրոպական խորհուրդը հրապարակել է  Ուկրաինայի, Մերձավոր Արևելքի, անվտանգության և պաշտպանության, մրցունակության, միգրացիայի, արտաքին քաղաքականության, հիբրիդային սպառնալիքների և հաջորդ ինստիտուցիոնալ շրջանի վերաբերյալ եզրակացությունը։

Փաստաթղթում, ի թիվս այլ հարցերի, Եվրոպական խորհուրդն իր «լուրջ մտահոգությունն» է հայտնում Վրաստանում տեղի ունեցած իրադարձությունների վերաբերյալ և «վրացական իշխանություններին կոչ է անում հստակեցնել իրենց մտադրությունները՝ փոխելով գործողությունների ներկայիս կուրսը, որը սպառնում է Վրաստանի ուղուն դեպի ԵՄ և մոտեցնում է անդամակցության գործընթացի կասեցմանը»։

Վրաստանի վերաբերյալ այս եզրակացությունն արվել է «օտարերկրյա գործակալների» մասին վիճահարույց օրենքի ընդունման ֆոնին։

Ըստ Եվրոպական խորհրդի՝ Վրաստանում պետք է դադարեցվեն քաղաքական առաջնորդների, քաղաքացիական հասարակության ակտիվիստների և լրագրողների դեմ ահաբեկումները, սպառնալիքներն ու ֆիզիկական հարձակումները։

«Ցանկացած երկրի համար, որը ձգտում է անդամակցել ԵՄ-ին, կարևոր է հարգել այն արժեքներն ու սկզբունքները, որոնց վրա հիմնվել է Եվրամիությունը»,- ասվում է փաստաթղթում։

Եվրոպական խորհուրդը նաև խոստանում է ուշադիր հետևել իրավիճակին խորհրդարանական ընտրություններից առաջ և կոչ է անում վրացական իշխանություններին՝ ապահովել, որ «այս տարվա աշնանը կայանալիք խորհրդարանական ընտրություններն ազատ և արդար լինեն»։

Միևնույն ժամանակ, Եվրոպական խորհուրդը վերահաստատում է իր «անսասան աջակցությունը» Վրաստանի տարածքային ամբողջականությանը, ևս  մեկ անգամ հայտնում է իր ամուր համերաշխությունը Վրաստանի ժողովրդի հետ և իր պատրաստակամությունը՝ շարունակելու աջակցել նրանց եվրոպական ապագայի ճանապարհին։