06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
ԱՄՆ կոնգրեսականները ԼՂ-ում էթնիկ զտումների համար Ադրբեջանին դատապարտող երկկուսակցական բանաձև են ներկայացրել
Քաղաքականություն
28.06.2024 | 13:18
ԱՄՆ Կոնգրեսի Ներկայացուցիչների պալատի անդամները՝ դեմոկրատ Աննա Էշուն և հանրապետական Քրիս Սմիթը ներկայացրել են երկկուսակցական բանաձև, որը դատապարտում է Ադրբեջանին Լեռնային Ղարաբաղի (Արցախ) հայ բնակչության նկատմամբ էթնիկ զտումներ իրականացնելու համար:
«Անցյալ տարի ադրբեջանական հարձակումը Լեռնային Ղարաբաղի վրա բերեց հայկական համայնքի ոչնչացմանը, որը դարեր շարունակ այդ շրջանը տուն է կոչել: Ադրբեջանի գործողությունները համապատասխանում են էթնիկ զտումների ամեն սահմանմանը և որպես այդպիսին պետք է դատապարտվեն»,- ասել է Էշուն։
Նա նշել է, որ բանաձևը հստակ արձանագրում է հայ ժողովրդի դեմ իրագործված վայրագությունները և նախանշում է այն կարևոր քայլերը, որոնք «ԱՄՆ-ը պետք է ձեռնարկի արդարադատության հասնելու և այդ հանցագործությունների համար պատասխանատվության կանչելու համար»։
Սմիթն իր հերթին հայտարարել է, որ Ադրբեջանի կողմից Լեռնային Ղարաբաղում ապրող հայերի նկատմամբ իրականացված սարսափելի վայրագությունները և էթնիկ զտումները չեն չեզոքացնում հայերի իրավունքը՝ ապրելու իրենց հինավուրց հայրենիքում խաղաղ և ազատ, դավանելու իրենց հավատքը, հետևելու իրենց սովորույթներին և խոսելու իրենց լեզվով։
«Մեր երկկուսակցական օրենսդրությունը կոչ է անում Բայդենի վարչակազմին ակտիվորեն աջակցել հայերի իրավունքներին՝ ընդդեմ Ադրբեջանի կառավարության շարունակական հանցագործությունների՝ իր դաժան բռնապետ Իլհամ Ալիևի օրոք»,-ասել է կոնգրեսականը։
