Էրդողանը հայտարարել է, որ Անկարայի ռազմավարական նպատակը ԵՄ-ին լիիրավ անդամակցությունն է

Անկարան իր ռազմավարական նպատակ է դիտարկում Եվրամիությանը լիիրավ անդամակցությունը։ Այս մասին հայտարարել է Թուրքիայի նախագահ Ռեջեփ Թայիփ Էրդողանը Էստոնիայի նախագահ Ալան Կարիսի հետ Անկարայում կայացած համատեղ ասուլիսում, գրում են տեղական լրատվամիջոցները։

«Եվրամիությանը լիիրավ անդամակցությունը, ինչպես մենք պարբերաբար շեշտում ենք, մեր ռազմավարական նպատակն է։ Մեր ընդհանուր շահերից է բխում, որ ԵՄ-ն Թուրքիային մոտենա նմանատիպ դիրքերից։ Վստահ եմ, որ Էստոնիայի աջակցությունը Թուրքիային այս համատեքստում կշարունակի աճել։ Այս ակնկալիքների մասին ես ասացի պարոն Կարիսին»,-ասել է Էրդողանը։

Նա նշել է, որ նախագահ Կարիսի հետ բանակցությունների ընթացքում հաստատել են Թուրքիայի և Էստոնիայի միջև հարաբերությունները զարգացնելու ընդհանուր կամքը, քննարկել այդ ուղղությամբ ձեռնարկվելիք համատեղ քայլերը։ Թուրքիայի նախագահը նաև ասել է, որ որպես ՆԱՏՕ-ի դաշնակիցներ՝ իրենք կարող են հիմնվել պաշտպանական արդյունաբերության ոլորտում առկա համագործակցության վրա՝ լրացուցիչ նախագծեր զարգացնելով։

Բանակցությունների ընթացքում քննարկվել է նաև Ուկրաինայի պատերազմը։

«Ես ևս մեկ անգամ ընդգծել եմ աջակցությունն Ուկրաինայի տարածքային ամբողջականությանն ու ինքնիշխանությանը։ Միայն դիվանագիտության միջոցով որքան հնարավոր է՝ շուտ կարելի է վերջ դնել Ուկրաինայում ավերվածություններին և հասնել արդարացի ու վերջնական լուծման։ Մենք նախկինի պես համոզված ենք, որ նախաձեռնությունները՝ ուղղված Ռուսաստանի բացառմանը, չեն բերի ցանկալի արդյունքների»,- հայտարարել է Էրդողանը։