06.06.2026 | 00:39
ԿԸՀ-ն մերժեց «Ուժեղ Հայաստան»-ի գրանցումն անվավեր ճանաչելու «Հանրապետության» դիմումը
Եվրոպական խորհուրդն ընտրել է Եվրամիության նոր ղեկավարներին
Քաղաքականություն
28.06.2024 | 11:40
ԵՄ երկրների 27 առաջնորդները հունիսի 27-ի երեկոյան Բրյուսելում կայացած գագաթնաժողովում քվեարկել են քաղաքական ղեկավարության հարցով։ Առաջիկա հինգ տարիներին Ուրսուլա ֆոն դեր Լեյենը կշարունակի ղեկավարել Եվրահանձնաժողովը, Անտոնիո Կոստան կլինի Եվրոպական խորհրդի նախագահը, իսկ Կայա Կալլասը՝ արտաքին գործերի և անվտանգության քաղաքականության հարցերով բարձր ներկայացուցիչը, գրում է Euronews-ը։
Առաջնորդները նաև հաստատել են Ռազմավարական օրակարգը՝ հավակնոտ փաստաթուղթ, որը կուղղորդի նշանակված երեք պաշտոնյաների հետագա աշխատանքը:
Ֆոն դեր Լեյենի ու Կալլասի թեկնածությունները դեռևս վերջնական չեն և պահանջում են Եվրախորհրդարանի հաստատումը։ Փոխարենը Կոստան՝ Պորտուգալիայի նախկին վարչապետը, արդեն ընտրվել է իր նախկին գործընկերների կողմից։ Նա պաշտոնը կստանձնի ավելի ուշ:
Կուսակցական բանակցողները երեքշաբթի կայացած հեռախոսազրույցում նախնական համաձայնության էին եկել գործարքի շուրջ և հինգշաբթի երեկոյան ներկայացրել իրենց առաջարկը: Բոլոր պետությունների և կառավարությունների ղեկավարների քննարկումից հետո համաձայնագիրը ստացել է պաշտոնական հաստատում։
Այս բանակցությունները զայրացրել են նրանց, որոնք մնացել են մի կողմում, մասնավորապես, Իտալիայի վարչապետ Ջորջիա Մելոնիին, որը քննադատել է բարձրագույն ղեկավարության կազմավորման «սյուրռեալիստական» ձևը: Մելոնին ավելի շատ ներգրավվածության և ավելի խորը քննարկման կոչ է արել։
Հունգարիայի վարչապետ Վիկտոր Օրբանն իր հերթին գործարքն անվանել է «խայտառակ»:
Նրանց հանրային դժգոհությունը հակադրվում է այլ գործիչների ակնհայտ սառնասրտությանը, ինչպիսիք են Գերմանիայի կանցլեր Օլաֆ Շոլցը և Ֆրանսիայի նախագահ Էմանուել Մակրոնը, որոնք վճռական էին՝ ավարտել գործընթացը արագ և առանց ավելորդ բարդությունների:
