ԱՄՆ-ում տեղի է ունեցել Բայդենի և Թրամփի առաջին հեռուստաբանավեճը

ԱՄՆ-ում նոյեմբերի 5-ին կայանալիք նախագահական ընտրություններից առաջ հունիսի 27-ին տեղի է ունեցել նախագահ Ջո Բայդենի և Սպիտակ տան նախկին ղեկավար Դոնալդ Թրամփի առաջին հեռուստաբանավեճը։ Քաղաքական գործիչները ելույթ են ունեցել Ջորջիա նահանգի Ատլանտայում՝ CNN-ի տաղավարում, փոխանցում է DW-ի ռուսական ծառայությունը։

Բանավեճը սկսվել է ԱՄՆ-ի տնտեսությունում տիրող իրավիճակի քննարկմամբ։ Թրամփն ու Բայդենը մտքեր են փոխանակել գնաճի, աշխատատեղերի և հարկային քաղաքականության վերաբերյալ։ Սպիտակ տան ղեկավարը թվարկել է այն գործոնները, որոնք համարում է իր նախագահության տնտեսական հաջողությունը՝ հավելելով, որ «դեռևս շատ անելիքներ կան»։ Թրամփն էլ ընդհատել է՝ հայտարարելով, որ գնաճը «սպանում է» ԱՄՆ-ին։

Ներգաղթի և հղիության արհեստական ​​ընդհատման արգելքի վերաբերյալ կարծիքներ փոխանակելուց հետո նրանք անցել են արտաքին քաղաքականության օրակարգին։

Նախ քննարկվել է Ուկրաինայում պատերազմը։ Մոդերատոր Դանա Բաշը բանավեճի մասնակիցներին հարցրել է՝ ընդունելի՞ են համարում ՌԴ նախագահ Վլադիմիր Պուտինի առաջադրած հրադադարի պայմանները։ Թրամփը մեղադրել է Բայդենին՝ հայտարարելով, թե լայնամասշտաբ ներխուժումը երբեք չէր լինի, եթե ԱՄՆ-ն «առաջնորդ ունենար»։

«Սա պատերազմ է, որը երբեք չպետք է սկսվեր»,- ասել է նախկին նախագահը՝ պնդելով, որ Բայդենի օրոք Կիևին հատկացվել է «200 միլիարդ դոլար կամ ավելի», որը շատ մեծ գումար է։

Հարցին՝ արդյո՞ք Թրամփն ընդունելի է համարում Պուտինի պահանջները, նա պատասխանել է. «Ո՛չ, դրանք անընդունելի են»։

Նախագահ Ջո Բայդենն իր հերթին Վլադիմիր Պուտինին անվանել է «ռազմական հանցագործ»։

«Նրան պետք է ամբողջ Ուկրաինան»,- ընդգծել է նա։

Սպիտակ տան ղեկավարը նաև կարծիք է հայտնել, որ Պուտինը դրանով չի սահմանափակվի։

«Ի՞նչ եք կարծում՝ ի՞նչ կլինի Լեհաստանի հետ»,- հարց է ուղղել Բայդենը՝ մտահոգություն հայտնելով, որ պատերազմը կարող է տարածվել ՆԱՏՕ-ի երկրների վրա։

Անդրադառնալով Գազայի հատվածում տիրող իրավիճակին՝ Ջո Բայդենը հայտարարել է, որ քննարկվում է մի ծրագիր, որը նախատեսում է իսրայելցի պատանդների փոխանակում պաղեստինցի գերիների հետ և «երկարաժամկետ հրադադար՝ լրացուցիչ պայմաններով»։

Դոնալդ Թրամփն ուղղակիորեն չի պատասխանել հարցին՝ արդյո՞ք կաջակցի անկախ պաղեստինյան պետության ստեղծմանը Գազայի հատվածում Իսրայելի և ՀԱՄԱՍ-ի միջև պատերազմի ավարտի համար։

«Պետք է տեսնենք»,- հակիրճ ասել է  Թրամփը, ապա անցել եվրոպական երկրների հետ առևտրային գործարքների քննարկմանը:

Նշվում է, որ 81-ամյա Ջո Բայդենի և 78-ամյա Դոնալդ Թրամփի հեռուստաբանավեճը տևել է 90 րոպե՝ երկու գովազդային ընդմիջումներով։