30.05.2026 | 15:55
Սահմանափակվելու է երթևեկությունը Աջափնյակ վարչական շրջանում
Կառավարությունը 1,7 մլրդ դրամ ուղղեց լուծարված ԱՆԻՖ-ի պարտավորությունների մարման համար
27.06.2024 | 18:16
Կառավարությունը չզեկուցվող հարցերի փաթեթով որոշեց 1,7 միլիարդ դրամ ուղղել Հայաստանի պետական հետաքրքրությունների ֆոնդի՝ ԱՆԻՖ-ի պարտավորությունների մարմանը։
Կառավարության որոշման հիմնավորման համաձայն՝ այդ գումարն ուղղվում է ԱՆԻՖ-ի «պարտավորությունների մարման և 2024-ի պահպանման ծախսերի համար»։
«Միաժամանակ նախատեսվում է «Հայաստանի պետական հետաքրքրությունների ֆոնդ» փակ բաժնետիրական ընկերության դուստր ընկերություն հանդիսացող «Ձեռնարկատեր+պետություն հակաճգնաժամային ներդրումների կառավարիչ» փակ բաժնետիրական ընկերության «Ձեռնարկատեր+պետություն հակաճգնաժամային ներդրումներ» փակ ոչ հրապարակային մասնագիտացված պայմանագրային ներդրումային ֆոնդից չտեղաբաշխված 1 700 000 հազ.դրամ գումարը ֆոնդի փայերի մարման ճանապարհով փոխանցել ՀՀ պետական բյուջե»,- նշված է որոշման մեջ։
Հիշեցնենք, որ մայիսի 23-ի կառավարության որոշումով էլ ԱՆԻՖ-ը լուծարվել էր։
ԱՆԻՖ-ի ստեղծման մասին Կառավարությունը որոշում էր կայացրել 2019-ի ապրիլին: 2019-2021 թթ. ընկերության բաժնետոմսերի կառավարումը հանձնված էր Էկոնոմիկայի նախարարությանը, 2021-ին այդ լիազորությունը հանձնվեց վարչապետի աշխատակազմին, իսկ 2023-ի մայիսին հերթական փոփոխությունը եղավ, և ԱՆԻՖ-ը նորից անցավ Էկոնոմիկայի նախարարության վերահսկողության տակ:
Կոռուպցիայի կանխարգելման հանձնաժողովն ու Պետական վերահսկողական ծառայությունը 2022-2023 թթ. ենթադրյալ չարաշահումներ էին հայտնաբերել ԱՆԻՖ-ում, որոնք առնչվում էին ֆոնդի ղեկավար կազմի գործունեությանը: Քննչական կոմիտեում ներկայում նախաքննություն է ընթանում քրեական վարույթով, որը նախաձեռնվել է երկու քրեական հոդվածների հատկանիշներով (1. առևտրային կազմակերպությունում լիազորությունները չարաշահելու հետևանքով առանձնապես խոշոր չափերի գույքային վնաս հասցնելը, 2. առանձնապես խոշոր չափերով վստահված գույքը հափշտակելը):
Բացի այս, անցած տարի ԱՆԻՖ-ում խնդիրներ էր հայտնաբերել նաև Արժույթի միջազգային հիմնադրամը, որոնք առնչվել են հաշվետվողականությանը, թափանցիկությանը։
Մանյա Պողոսյան
