22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
Թուրքիայի ընդդիմադիր կուսակցության առաջնորդը հայտարարել է 18 ամսվա ընթացքում արտահերթ ընտրությունների անցկացման հնարավորության մասին
Քաղաքականություն
27.06.2024 | 22:55
Թուրքիայի գլխավոր ընդդիմադիր Ժողովրդահանրապետական կուսակցության (CHP) առաջնորդ Օզգյուր Օզելը հայտարարել է, որ երկրի քաղաքացիների գրեթե կեսը պահանջում է արտահերթ ընտրություններ։ Նա կանխատեսում է, որ այդ ընտրությունները կարող են տեղի ունենալ առաջիկա 18 ամիսների ընթացքում, գրում են թուրքական լրատվամիջոցները։
Վերջին անգամ Թուրքիայում նախագահական և խորհրդարանական ընտրություններ անցկացվել են 2023 թվականի մայիսին, երբ նախագահ Ռեջեփ Թայիփ Էրդողանը պաշտոնավարման ևս մեկ ժամկետ ապահովեց։ Հաջորդ ընտրությունները, ըստ ժամանակացույցի, նախատեսվում են 2028 թվականին։
Մարտին կայացած ՏԻՄ ընտրություններում CHP-ն 47 տարվա մեջ առաջին անգամ հաղթանակ է տարել՝ ապահովելով ձայների 37,7 տոկոսը, մինչդեռ երկրի նախագահ Ռեջեփ Թայիփ Էրդողանի գլխավորած իշխող «Արդարություն և զարգացում» կուսակցությունը, 22 տարվա մեջ առաջին անգամ, հայտնվել է երկրորդ տեղում՝ հավաքելով ընդամենը 35,4 տոկոս ձայն։
Արտահերթ ընտրությունների մասին խոսակցությունները հայտնվել են երկրի օրակարգում մարտի 31-ի ընտրություններում ԱԶԿ-ի պարտությունից հետո, թեև հիմնական ընդդիմադիր CHP-ն արտահերթ ընտրությունների կոչ չի արել։ Օզելը մինչ այժմ հրաժարվել է նման կոչերից: Նա նշել է, որ CHP-ն արտահերթ ընտրությունների կոչ չի անի տեղական ընտրությունների արդյունքների հիման վրա, սակայն ընդգծել է, որ արտահերթ ընտրությունների ժողովրդի պահանջը որոշիչ գործոն է։
Օզելը մեջբերել է վերջին հարցումները, որոնք ցույց են տալիս, որ CHP-ն ամեն ամիս ընդլայնում է իր առաջատար դիրքը՝ պահպանելով այն որպես երկրի առաջին կուսակցություն: Օզելը լրագրողների հետ զրույցում ասել է, թե կանխատեսում է, որ թուրքերը կրկին կգնան ընտրությունների մեկուկես տարի հետո՝ երկու համընդհանուր ընտրությունների միջև ընկած հինգ տարվա կեսին:
«Այս պայմաններում մենք պետք է տեսնենք՝ արդյո՞ք հանրությունը ցանկանում է արտահերթ ընտրություններ։ Ամեն ամիս այդ պահանջարկը մի փոքր ավելանում է։ Հասարակության գրեթե կեսն այժմ պահանջում է արտահերթ ընտրություններ։ Քանի դեռ արտահերթ ընտրությունների պահանջը մեծանում է, մենք կշարունակենք դրան նպաստել»,- ասել է նա։
Ընդդիմադիր կուսակցության ղեկավարը նաև նշել է, որ առանց իշխող կուսակցության աջակցության՝ տեխնիկապես հնարավոր չէ արտահերթ ընտրություններ անցկացնել, քանի որ վաղաժամկետ քվեարկության գնալու համար անհրաժեշտ է 600 պատգամավորներից 360-ի ձայները, իսկ ընդդիմությունն այդքան ձայն խորհրդարանում չունի։
Ըստ ընդդիմության ղեկավարի՝ եթե տնտեսությունը մնա ներկայիս վատ վիճակում՝ 75 տոկոսից ավելի գնաճով, մարդիկ, ամենայն հավանականությամբ, կպահանջեն արտահերթ ընտրություններ և կքվեարկեն ԱԶԿ-ի պաշտոնանկության համար։
Հավելենք, որ հունիսի սկզբին Էրդողանը 18 տարի անց այցելել էր գլխավոր ընդդիմադիր Ժողովրդհանրապետական կուսակցության՝ CHP-ի կենտրոնակայան, որտեղ նրան դիմավորել էր Օզգյուր Օզելը։ Էրդողանն ու Օզելը լուսանկարվել էին մամուլի ներկայացուցիչների համար, այնուհետև տեղի է ունեցել կողմերի հանդիպումը։ Էրդողանը վերջին անգամ այցելել էր CHP-ի այն ժամանակվա նախագահ Դենիզ Բայկալին 18 տարի առաջ՝ վարչապետի պաշտոնում։ Նա մասնակցել էր կուսակցության գլխավոր շտաբի նոր շենքի բացման համար։ Մինչ այդ, մայիսի 2-ին էլ Էրդողանն ԱԶԿ-ի կենտրոնակայանում էր ընդունել CHP-ի նախագահ Օզգյուր Օզելին։
Էմմա Չոբանյան
