19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Բերձորում հեղեղների հետևանքով Հակարի գետի նորակառույց կամուրջը փլուզվել է
Քաղաքականություն
27.06.2024 | 17:31
Հորդառատ անձրևների հետևանքով ջրհեղեղները շարունակում են վնասներ հասցնել Արցախի Բերձորին։ Ադրբեջանական լրատվամիջոցների հաղորդմամբ՝ հեղեղներից փլուզվել է Հակարի գետի վրա նոր կառուցված կամուրջը։
Նշենք, որ վերջին շրջանի հորդառատ անձրևները հեղեղել էին նաև նորակառույց տները։ Համացանցում կադրեր էին տարածվել, որոնցում երևում է, թե ինչպես է ջուրը լցվել տներ, նկուղներ և բակեր։ Հեղեղը քանդել էր նաև վերջերս կառուցված ճանապարհները։ Վնասներից դժգոհում էին Աղավնո և Սուս գյուղի բնակիչները։
Հավելենք, որ Բերձորում նորակառույց տների խնդիրների մասին բնակիչները բարձրաձայնում են վաղուց։ Դեռևս մեկ տարի առաջ ադրբեջանական աղբյուրները տեղեկություններ էին հայտնում, որ բնակություն հաստատած ադրբեջանցիները սկսել են հեռանալ, իսկ շատերը հրաժարվում են պետության կառուցած տներից, քանի որ դրանք անորակ են։ Բացի այդ, այնտեղ աշխատատեղեր չկան, հողամասեր հատկացված չեն, բազմաթիվ այլ խնդիրներ կան։
Ադրբեջանցի ընդդիմադիր գործիչներն ու լրատվամիջոցները պարբերաբար տեղեկություններ են հրապարակում Արցախում իրականացվող շինաշխատանքներում կոռուպցիոն սխեմաների մասին։ Արցախում շինարարական ու կառուցապատման աշխատանքներով հիմնականում զբաղվում է Ադրբեջանի նախագահ Ալիևի կնոջ՝ Մեհրիբան Ալիևայի հորը՝ Արիֆ Փաշաևին պատկանող Pasha Holding-ն ու դրա հետ կապված ընկերությունները։
Էմմա Չոբանյան
