Բոլիվիայում հեղաշրջման փորձը ձախողվել է․ զինվորականները նահանջել են նախագահական պալատից

Բոլիվիայում ոստիկանությունը կալանավորել է գեներալ Խուան Խոսե Սունիգային, որը երկրում հեղաշրջում իրականացնելու փորձ է կատարել, գրում է BBC-ի ռուսական ծառայությունը։ Զինվորականները շրջափակել էին  մայրաքաղաք Լա Պասում նախագահական պալատը և փորձել գրոհել այն։ Փորձը անհաջողության է մատնվել՝զինվորականները ստիպված են եղել նահանջել։

Ավելի վաղ Բոլիվիայի նախագահ Լուիս Արսեն կոչ էր արել երկրի բնակիչներին ընդդիմանալ «պետական ​​հեղաշրջմանը», այն բանից հետո, երբ զինվորականները փորձել էին ներխուժել մայրաքաղաք Լա Պասում գտնվող ժողովրդի Մեծ տուն, որտեղ գտնվում է նախագահական նստավայրը։

«Անհրաժեշտ է, որ Բոլիվիայի ժողովուրդը կազմակերպվի և մոբիլիզացվի պետական ​​հեղաշրջման դեմ՝ հանուն ժողովրդավարության։ Մենք չենք կարող թույլ տալ, որ հեղաշրջման փորձերը կրկին խլեն բոլիվացիների կյանքեր»,- դիմել է նախագահը երկրի քաղաքացիներին։

Չորեքշաբթի երեկոյան զորքերը փակել էին Լա Պասի Մուրիլյո հրապարակի մուտքերը, որտեղ գտնվում են կառավարական շենքերը։ Հրապարակում դիրքեր են զբաղեցրել զրահամեքենաներ, զինվորներ։ Reuters-ի աղբյուրը տեսել էր, թե ինչպես է զրահամեքենան հարվածում նախագահական պալատի դռանը, և զինվորները ներխուժում են ներս։

Հարձակումը գլխավորել է Բոլիվիայի բանակի գեներալ Խուան Խոսե Սունիգան, որը հենց նոր էր ազատվել հրամանատարի պաշտոնից: Նա ասել էր, որ զինվորականների նպատակը երկրում ժողովրդավարության վերականգնումն է։ Գեներալը խոստացել էր նաև բանտերից ազատել բոլոր քաղբանտարկյալներին։

Ավելի ուշ նախագահը հայտարարեց, որ ընդունել է զինված ուժերի նոր ղեկավարության երդումը։ Նոր հրամանատար Խոսե Վիլսոն Սանչես Վելասկեսը զինվորականներին հրամայել է նահանջել պալատից։ «Ես հրամայում եմ՝  փողոցներում մոբիլիզացված անձնակազմը վերադառնա իրենց ստորաբաժանումներ։ Կոչ ենք անում չթափել մեր զինվորների արյունը»,-ասել է նա։

Դրանից հետո զինվորականները սկսել են լքել Մուրիլոյի հրապարակը։ Ոստիկանությունը վերահսկողության տակ է վերցրել հրապարակը։ Բոլիվիայի գլխավոր դատախազը հետաքննություն է սկսել գեներալի և հարձակման այլ մասնակիցների գործողությունների վերաբերյալ։ Գեներալին ձերբակալել են։ Նրանից բացի ձերբակալվել է նաև ռազմածովային ուժերի նախկին հրամանատար Խուան Արնես Սալվադորը։