Ալիևը Իտալիայի ՊՆ ղեկավարի հետ ռազմատեխնիկական ոլորտում համագործակցության հարցեր է քննարկել

Ադրբեջանի նախագահ Իլհամ Ալիևն ընդունել է Իտալիայի պաշտպանության նախարար Գուիդո Կրոզետոյի գլխավորած պատվիրակությանը։ Նրա պատվիրակության կազմում են եղել նաև Իտալիայի արտաքին գործերի և միջազգային համագործակցության փոխնախարար Էդմոնդո Չիրիելին, հայտնում է Ադրբեջանի նախագահականը։

Ալիևն ասել է, որ նշանակալից օր է Ադրբեջան-Իտալիա հարաբերությունների պատմության մեջ, նոր էջ է բացվել հարաբերություններում, և որ երկրներն արդեն սկսել են համագործակցությունը ռազմատեխնիկական ոլորտում։ Ընդգծելով, որ Իտալիան ունի բարձր զարգացած ռազմատեխնիկական արդյունաբերություն, Ալիևը C-27J Spartan տեսակի ռազմատրանսպորտային ինքնաթիռի մատակարարումն Ադրբեջանին գնահատել է երկու երկրների հարաբերությունների բարձր մակարդակի ցուցանիշ։

Ալիևն ասել է, որ Իտալիան և Ադրբեջանը բազմաթիվ ոլորտներում հանդես են գալիս որպես ռազմավարական գործընկերներ՝ հայտարարելով, որ եվրոպական տարածքում Բաքվի առևտրային հարաբերությունների մեծ մասը բաժին է ընկնում Իտալիային, իսկ ապրանքաշրջանառությունը գերազանցում է 15 միլիարդ դոլարը։ Նա գոհունակությամբ նշել է, որ իտալական բազմաթիվ ընկերություններ հաջողությամբ գործում են Ադրբեջանում և մասնակցում մի շարք նախագծերի։

Նշելով, որ նավթագազային ոլորտում համագործակցությունը կարևոր է ոչ միայն երկու երկրների, այլև ամբողջ եվրոպական տարածքի համար, Ադրբեջանի նախագահն ընդգծել է, որ դրա զարգացման հիմքում ընկած են ամուր քաղաքական հարաբերությունները, իսկ «Ռազմավարական գործընկերության մասին» համատեղ հռչակագիրը այդ հարաբերությունների հիմքն է կազմում։

Իտալիայի պաշտպանության նախարարն իր հերթին գոհունակությունն է հայտնել ռազմարդյունաբերության ոլորտում երկու երկրների համագործակցության մեկնարկի կապակցությամբ։

Նշենք, որ Իտալիայից պատվիրակության մասնակցությամբ այսօր Իլհամ Ալիևին է ներկայացվել իտալական Leonardo ընկերության արտադրած և Բաքվի կողմից ձեռքբերված C-27J Spartan ռազմատրանսպորտային ինքնաթիռը։ Դեռևս անցյալ տարի հունիսին իտալական Leonardo կոնցեռնը հայտարարել էր Ադրբեջանի ռազմաօդային ուժերի համար C-27J Spartan ռազմատրանսպորտային ինքնաթիռների մատակարարման պայմանագրի կնքման մասին։

Էմմա Չոբանյան