07.10.2026 | 15:10
ՀՀ-ում հրթիռների արտադրության հարցի քննարկում Դելիի հետ՝ ըստ ԶԼՄ-ի // Երևանում փակ փողոցներ կլինեն․ ԼՈՒՐԵՐ
ՌԴ-ն և Ուկրաինան ռազմագերիների են փոխանակել՝ «90-ը 90-ի դիմաց» սկբունքով
Քաղաքականություն
26.06.2024 | 11:13
Ռուսաստանն ու Ուկրաինան հերթական անգամ գերիների են փոխանակել՝ «90-ը 90-ի դիմաց» սկզբունքով։ Այս մասին հայտնել են Ուկրաինայի նախագահ Վլադիմիր Զելենսկին և ՌԴ պաշտպանության նախարարությունը։
Զելենսկին նշել է, որ Ուկրաինա են վերադարձել Ազգային գվարդիայի, ռազմածովային ուժերի, զինված ուժերի, տարածքային պաշտպանության և սահմանապահ ուժերի զինծառայողները։
«Նրանք, ովքեր պաշտպանել են Մարիուպոլը, Չեռնոբիլի ԱԷԿ-ը։ Նրանք, որոնք եղել են Խերսոնի, Դոնեցկի, Խարկովի, Զապորոժիեի և Լուգանսկի ուղղություններում»,- Տելեգրամում գրել է նա՝ շնորհակալություն հայտնելով բոլորին, որոնք մասնակցել են այդ գործընթացին, այդ թվում՝ ԱՄԷ-ին, որը միջնորդ է հանդես եկել։
ՌԴ ՊՆ-ից էլ հայտնել են, որ ազատ արձակված զինծառայողները կտեղափոխվեն Մոսկվա՝ գերատեսչության բուժհաստատություններում բուժման ու վերականգնողական նպատակով։ Բոլոր ազատ արձակվածներին ցուցաբերվում է բժշկական և հոգեբանական օգնություն։
Կողմերի միջև գերիների նախորդ փոխանակումը տեղի էր ունեցել այս տարվա մայիսի 31-ին։
