06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
Օվերչուկը հայտարարել է, թե ՌԴ-ի և Ադրբեջանի հարաբերությունները ծաղկուն շրջանում են
Քաղաքականություն
25.06.2024 | 22:14
Ռուսաստանն ու Ադրբեջանը ծաղկուն հարաբերությունների շրջան են ապրում։ Այս մասին հայտարարել է ՌԴ փոխվարչապետ Ալեքսեյ Օվերչուկը «Պրիմակովյան ընթերցումների» ժամանակ, գրում է NEWS.ru-ն։
Նրա խոսքով՝ Մոսկվան և Բաքուն հաջողությամբ համագործակցում են «Հյուսիս-Հարավ» միջազգային տրանսպորտային միջանցքի զարգացման և այլ նախագծերի շուրջ։
«Մենք ծաղկուն հարաբերությունների շրջան ենք ապրում Ադրբեջանի հետ։ Մենք ունենք մի շարք նախագծեր՝ շատ հետաքրքիր, խոշոր, այդ թվում՝ արդյունաբերական զարգացման ոլորտում։ Մենք համատեղ արդիականացրել ենք մեր անցակետերը։ Տրանսպորտային միջոցների մաքսազերծման աշխատանքները շատ արդյունավետ են, սահմանին ուշացումներ չկան»,- նշել է նա։
Օվերչուկն ասել է, որ Ադրբեջանն իրեն դիրքավորում է որպես «տրանզիստոր երկիր», ինչը չափազանց օգտակար է Ռուսաստանի համար տնտեսական զարգացման տեսանկյունից։ Նրա խոսքով՝ Բաքվի քաղաքականությունը Մոսկվային թույլ է տալիս զարգացնել արտահանման հոսքերը և բարելավել պայմանները գլոբալ հարավի ուղղությամբ դրանց առաջխաղացման համար։
«Իրանում մենք այսօր զբաղվում ենք Ռեշտ-Աստարա երկաթուղու 168 կիլոմետրանոց հատվածի կառուցմամբ և դեպի իրանական Բանդար Աբբաս և Չաբահար նավահանգիստներ մուտք գործելու աշխատանքներով։ Այնուհետև մենք մուտք կունենանք դեպի Լիբիա և այլ արաբական ու աֆրիկյան երկրներ: Սրանք հենց այն գլոբալ ընդլայնվող շուկաներն են, որոնք մեզ այսօր անհրաժեշտ են մեր զարգացման համար»,- հայտարարել է Օվերչուկը։
