09.09.2026 | 20:19
«Առգրավումներն իրականացվել են կամայականորեն՝ շոուի նպատակով». Գագիկ Խաչատրյանի պաշտպանական կողմը՝ ՔԿ-ի գործողությունների մասին
Թրամփը նախագահ ընտրվելու դեպքում դիտարկում է Ուկրաինային ամերիկյան ռազմական օգնությունը դադարեցնելու ծրագիրը, եթե Կիևը բանակցություններ չսկսի Մոսկվայի հետ. Reuters
Քաղաքականություն
25.06.2024 | 14:53
Դոնալդ Թրամփի երկու առանցքային խորհրդականները Ուկրաինայում պատերազմին վերջ տալու ծրագիր են ներկայացրել, եթե քաղաքական գործիչը նոյեմբերին հաղթի ԱՄՆ նախագահական ընտրություններում, հայտնում է Reuters-ը։
Ծրագիրը ենթադրում է, որ Կիևը կզրկվի Վաշինգտոնի ռազմական օգնությունից, եթե խաղաղ բանակցություններ չսկսի Մոսկվայի հետ։ Միաժամանակ, ԱՄՆ-ը կզգուշացնի Ռուսաստանին, որ բանակցություններից հրաժարվելը կհանգեցնի Ուկրաինային ամերիկյան աջակցության ավելացմանը։ Ծրագրի համաձայն՝ խաղաղության բանակցությունների ընթացքում կողմերը պետք է համաձայնության գան հրադադարի շուրջ՝ հիմնված «եղած առաջնագծի» վրա։
Ծրագրի հեղինակներն են Քիթ Քելլոգը և Ֆրեդ Ֆլեյցը, որոնք 2017-2021 թվականներին Թրամփի նախագահության օրոք աշխատել են որպես ԱՄՆ Ազգային անվտանգության խորհրդի գործադիր քարտուղարներ: Ծրագրի հիմնական մանրամասներն ուրվագծվել են խորհրդականների զեկույցում, որը հրապարակվել է Քելլոգի և Ֆլեյցի կողմից ղեկավարվող հետազոտական կենտրոնի կայքում։
Ֆլեյցի խոսքով՝ ծրագիրը ներկայացրել են Թրամփին, որը դրական է արձագանքել։
«Ես չեմ ասում, որ նա համաձայն էր ծրագրի կամ դրա յուրաքանչյուր բառի հետ, բայց մենք ուրախ էինք, որ ստացանք այդ պատասխանը»,- ասել է նա։
Իր հերթին, Թրամփի մամուլի քարտուղար Սթիվեն Չունգը նշել է, որ պաշտոնական կարող են համարվել միայն քաղաքական գործչի կամ նրա նախընտրական շտաբի լիազորված անդամների հայտարարությունները։
