Քաղաքականություն
24.06.2024 | 21:16
ԱՄՆ Պետքարտուղարության նահանգային և քաղաքային դիվանագիտության հարցերով հատուկ ներկայացուցիչ, դեսպան Նինա Հաչիգյանը, որն այցով գտնվում էր ՀՀ-ում, հանգստյան օրերն անցկացրել է Սյունիքի մարզում և X-ում այցից տպավորություններով կիսվել։
«Ես հանգստյան օրերն անցկացրի Սյունիքում՝ հարավային Հայաստանում, նախքան տուն վերադառնալը: Այն իսկապես անհավանական վայր է: Պատմությունը, մշակույթը, սիրելի մարդիկ և ուշագրավ բնական գեղեցկությունը հիացրել են ինձ»,-գրել է նա։
Հաչիգյանը նշել է, որ Սյունիքի բնական գեղեցկությունն ապշեցուցիչ է, իսկ շուրջբոլորը հնագույն պատմություն է:
«Հայերն ու նրանց նախնիներն այստեղ են ապրում հազարավոր, նույնիսկ տասնյակ հազարավոր տարիներ։ Թող այդպես լինի խաղաղության մեջ գալիք հազարամյակների ընթացքում: Ինչպես ամենուր Հայաստանում, այնպես էլ Սյունիքում կային գեղեցիկ հին եկեղեցիներ, քանի որ Հայաստանն առաջին պետությունն էր, որն ընդունեց քրիստոնեությունը մ.թ. 301 թվականին: Որոշ կառույցներ, որոնք մենք տեսանք, վերաբերում են մեր թվարկության 400-ականներին: Մենք գնացինք աներևակայելի երկար ճոպանուղով՝ հասնելու դրանցից մեկը՝ Տաթևի վանական համալիր»,- գրել է Հաչիգյանը։
Նա նաև անդրադարձել է Արցախում Ադրբեջանի կողմից իրականացված էթնիկ զտմանը։
«Սեպտեմբերի Լեռնային Ղարաբաղի/Արցախի ռազմական գրավումից փախած ավելի քան 100,000 հայերից շատերը եկել են այստեղ: Այդ հողը դատարկելը, որտեղ հայերն ապրել են հազարավոր տարիներ, դեռ թարմ, ողբերգական հիշողություն է շատերի համար»,- նշել է նա։
Նինա Հաչիգյնաը գրել է, որ քայլել են հարյուրավոր տարիների վաղեմության հին գյուղերով, որոնք լցված էին մեծ պտղատու ծառերով, ինչպիսիք են թթենին և ընկույզը: Տներից մի քանիսը եղել են քարանձավներ, խորհրդային տարիներին ընտանիքները տեղափոխվել են նոր գյուղեր։
«Սյունիքում, ինչպես և ամենուր Հայաստանում, ուտելիքը թարմ էր և համեղ, բայց նրանք ունեն հատուկ տարածաշրջանային ուտեստներ և շատ լեռնային թեյ: Հուսով եմ՝ շուտով կվերադառնամ այստեղ»,- նշել է Նինա Հաչիգյանը։
